ភ្នំពេញ៖ នាព្រឹកថ្ងៃសុក្រ ទី០៣ ខែធ្នូ ឆ្នាំ២០២១ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានចាត់តាំងឲ្យក្រុមការងារចុះដើម្បីរៀបចំវគ្គសិក្ខាសាលាតម្រង់ទិសជំនាញសិក្សារបស់វិទ្យាស្ថានតេជោសែន សាធារណការ និងដឹកជញ្ជូនដល់សិស្សានុសិស្សថ្នាក់ទី១២ទាំងអស់នៃវិទ្យាល័យទាំងបួន នៅក្នុងស្រុកកោះធំ ខេត្តកណ្តាល។ នាឱកាសនោះក៏មានការអញ្ជើញចូលរួមពីលោកអភិបាលរងស្រុកកោះធំ, លោកប្រធានការិយាល័យអប់រំស្រុក, លោក លោកស្រី នាយកវិទ្យាល័យទាំងបួន លោកគ្រូ អ្នកគ្រូ សិស្សានុសិស្ស សរុបប្រមាណជិត២៥០នាក់។ កម្មវិធីនេះមានគោលបំណងដើម្បីតម្រង់ទិសជំនាញសិក្សា ការកំណត់គោលដៅ ការជ្រើសរើសជំនាញសិក្សា អត្ថប្រយោជន៍ និងឱកាសការងារ ការត្រៀមខ្លួនចូលរៀននៅវិទ្យាស្ថានតេជោសែនសាធារណការ និងដឹកជញ្ជូន ជូនដល់សិស្សានុសិស្សនៅវិទ្យាល័យ ទាំង០៤ នៅក្នុងស្រុកកោះធំ ខេត្តកណ្តាលរួមមាន៖ ១-វិទ្យាល័យ ប៊ុនរ៉ានី ហ៊ុនសែន ព្រែកតាដួង ២-វិទ្យាល័យ ហ៊ុនសែន សំពៅពូន ៣-វិទ្យាល័យ ហ៊ុនសែន កោះធំ ៤-វិទ្យាល័យ ហ៊ុនសែន កំពង់កុង។ សូមជម្រាបជូនថា វិទ្យាស្ថានតេជោសែន សាធារណការ និងដឹកជញ្ជូន គ្រោងនឹងបើកទទួលនិស្សិតជំនាន់ទី២ នាខែមករា ឆ្នាំ២០២២ ខាងមុននេះ លើជំនាញឯកទេសទាំង៦ ក្នុងនោះរួមមាន៖ ទី១.ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ។ ទី២.ជំនាញប្រព័ន្ធចម្រោះទឹកកខ្វក់ ទី៣.ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ទី៤.ជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់ ទី៥.ជំនាញបើកបរនាវា ទី៦.ជំនាញម៉ាស៊ីននាវា៕