ភ្នំពេញ៖ កាមេរ៉ាចាប់ល្បឿនឆ្លាតវៃត្រូវបានក្រសួងសាធារណការ និងដឹកជញ្ជូនដំឡើងនៅ១០ទីតាំង លើកំណាត់ផ្លូវជាតិលេខ៣ចាប់ពីចោមចៅទៅខេត្តកំពតដែលមានប្រវែងសរុប១៣៥គីឡូម៉ែត្រ។ គោលបំណងដែលក្រសួងដំឡើងកាមេរ៉ាឆ្លាតវៃនេះគឺដើម្បីតាមដានចាប់រថយន្តដែលបើកបរល្មើសច្បាប់ចរាចរណ៍។ កាមេរ៉ាចំនួន១០ទីតាំងនោះគឺមានចាប់ពីចោមចៅដល់ផ្លូវបែកគូសចំនួន៤ទីតាំង និងមានកាមេរ៉ាចំនួន៦ទីតាំងទៀត ចាប់ពីកំណាត់ផ្លូវពីបែកគូសទៅទីរួមខេត្តកំពត។ មុនដល់ទីតាំងកាមេរ៉ាចាប់ល្បឿននោះ អាជ្ញាធរនឹងបំពាក់ផ្លាកសញ្ញាជូនដំណឹងមុនដល់អ្នកបើកបរយ៉ាងតិច១គីឡូម៉ែត្រ។ ឯកឧត្តម ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគ្រប់គ្រងគម្រោងសាងសង់ផ្លូវជាតិលេខ៣បានបញ្ជាក់ប្រាប់អ្នកសារព័ត៌មានSBMតាមទូរសព្ទថា ក្រសួងដាក់កាមេរ៉ាវាស់ល្បឿនស្វ័យប្រវត្តិគឺដើម្បីចាប់រថយន្តដែលល្មើសល្បឿនកំណត់ និងល្មើសច្បាប់ចរាចរណ៍ផ្សេងៗ។ ជាពិសេសធានាសុវត្ថិភាពដល់អ្នកបើកបរផងដែរ។ រដ្ឋលេខាធិការក្រសួងសាធារណការ និងដឹកជញ្ជូនបានរៀបរាប់ដូច្នេះថា៖«យើងមិនមែនតែចាប់អ្នកល្មើសល្បឿននោះទេ​គឺចាប់អ្នកល្មើសច្បាប់ចរាចរណ៍ទាំងអស់តែម្តង។ បើកបរហើយ មិនពាក់ខ្សែក្រវ៉ាត់ ក៏ចូលទៅក្នុងកាមេរ៉ាហ្នឹងដែរ។ ក្នុងនោះក៏អាចចាប់បានព័ត៌មានគ្រោះថា្នក់ចរាចរណ៍ ក្នុងរយៈចម្ងាយខ្ទង់ ៤០០ ទៅ៥០០ម៉ែត្រ។ ចំណែកបទល្មើសចរាចរណ៍ជាក់ស្តែងនេះគឺក្នុងរង្វង់៥០០ម៉ែត្រដែរ»។ ក្រោយកាមេរ៉ានោះចាប់បានម្ចាស់យានយន្តដែលបើកបរល្មើសល្បឿនកំណត់ និងល្មើសច្បាប់ចរាចរណ៍ផ្សេងៗ តើនគរបាលចរាចរណ៍នឹងផាកពិន័យទៅដល់ម្ចាស់រថយន្តនោះភ្លាម ឬផាកពិន័យដល់ទីតាំង និងលំនៅឋានរបស់ម្ចាស់រថយន្តល្មើសច្បាប់នោះ? ឯកឧត្តម ខាន់ ម៉ាណេរ ប្រធានគ្រប់គ្រងគម្រោងសាងសង់ផ្លូវជាតិលេខ៣ បានអះអាងដូច្នេះថា៖«កាមេរ៉ានេះនឹងចាប់បាន នឹងបញ្ជូនមកមជ្ឈមណ្ឌល អគ្គស្នងការនគរបាលជាតិដើម្បីគាត់ពិនិត្យហើយ ហើយគាត់កត់ត្រាទុកឡានណាដែលមានបទល្មើសអ្វីខ្លះ ហើយត្រូវពិន័យប៉ុន្មាន។ ពិន័យមានចាប់ពី១២ម៉ឺនរៀលដល់៦៥ម៉ឺនរៀលគឺអាស្រ័យទៅលើឡានតូច ឡានធំ និងលំហំបទល្មើស។ អគ្គស្នងការនគរបាលជាតិមានភារកិច្ចពិនិត្យហើយ និងជូនដំណឹង ឬយកក្រដាសពិន័យហ្នឹងជូនទៅដល់ផ្ទះរបស់ម្ចាស់ឡាន ​និងបង្ហាញភស្តុតាងដែលគាត់បានល្មើសច្បាប់ចរាចរណ៍»។ តែយ៉ាងណាការផាកពិន័យរថយន្តដែលល្មើសច្បាប់ចរាចរណ៍នេះគឺមិនត្រូវបានអនុវត្តភ្លាមៗឡើយ។ «តាមគោលការណ៍ដោយសារតែនេះជាលើកទី១នៃការរៀបចំដាក់កាមេរ៉ាស្វ័យប្រវត្តិនេះ។ ក្នុងគោលដៅដែលយើងអនុវត្តនោះគឺយើងមិនអនុវត្តភ្លាមៗនោះដែរយើងនឹងសុំគោលការណ៍ពីឯកឧត្តមទេសរដ្ឋមន្ត្រី សម្តេចក្រឡាហោម ស ខេង។ យើងនឹងសុំរយៈពេលណាមួយយើងនឹងបញ្ជូនដំណឹងដល់ប្រជាពលរដ្ឋ»។ នេះជាការៀបរាប់របស់រដ្ឋលេខាធិការក្រសួងសាធារណការ និងដឹកជញ្ជូន។ បើតាមរដ្ឋលេខាធិការក្រសួងសាធារណការ និងដឹកជញ្ជូន នៅពេលមានវត្តមានកាមេរ៉ាចាប់ល្បឿននេះហើយនឹងកាត់បន្ថយកងកម្លាំងនគរបាលចរាចរណ៍​នៅតាមគោលដៅ។ លើសពីនេះកាមេរ៉ានេះនឹងជា​ឧបករណ៍ពញ្ញាក់ស្មារតីពលរដ្ឋគោរពច្បាប់ចរាចរណ៍ដើម្បីកាត់បន្ថយគ្រោះថ្នាក់ចរាចរណ៍​។ ក្រសួងសាធារណការ និងដឹកជញ្ជូននឹងបន្តសិក្សាដាក់កាមេរ៉ាចាប់ល្បឿនស្វ័យប្រវត្តិនេះនៅតាមផ្លូវជាតិ៥ផងដែរ។ នេះបើតាមឯកឧត្តម ខាន់ ម៉ាណេរ ដែលបន្តបញ្ជាក់ថា នៅថ្ងៃអនាគតកម្ពុជានឹងគ្រោងដាក់កាមេរ៉ាប្រភេទនេះឲ្យដល់គ្រប់បណ្តាខេត្ត។