[Kampuchea Thmey] - ផ្លូវជាតិលេខ ២ ស្ថាបនាយឺតមិនទាន់ផែនការ ទើបសម្រេចបាន ៤៥ ភាគរយ
2021-09-02
ទៅកាន់ទំព័រចុះផ្សាយក្នុង Kampuchea Thmey
កំណាត់ផ្លូវជាតិលេខ ២ មកដល់ពេលនេះទើបតែសម្រេចបានជាង ៤៥ ភាគរយ ហើយតាមលទ្ធផលការងារនឹងមិនរួចទាន់តាមផែនការនោះទេ។
ឯកឧត្តម ស៊ុន ចាន់ថុល រដ្ឋមន្រ្តីក្រសួងសាធាណរការនិងដឹកជញ្ជូន បានឆ្លើយតបការសាកសួររបស់ប្រជាពលរដ្ឋជុំវិញការសាងសង់កំណាត់ផ្លូវជាតិលេខ ២ ហើយឯកឧត្ដមបានរិះគន់លើភាពយឺតយ៉ាវលើការសាងសង់ផ្លូវជាតិមួយខ្សែនេះ។
ឯកឧត្តមស៊ុន ចាន់ថុល បានបញ្ជាក់ថា ខាងក្រុមហ៊ុនបានលើកពីបញ្ហាកូវីដធ្វើឲ្យរាំងស្ទះក្នុងការសាងសង់។ លោកបានរំលឹកដល់ក្រុមហ៊ុនកុំលើកតែបញ្ហាកូវីដតែមួយមុខ ត្រូវរកដំណោះស្រាយ ដោយត្រូវបន្ថែមគ្រឿងចក្រ កម្លាំងកម្មករ ទើបការងារអាចសម្រេចទាន់ផែនការ។
លោករដ្ឋមន្រ្តីបានបញ្ជាក់ថា ផ្លូវជាតិមួយខ្សែនេះគ្រោងរួចរាល់នៅខែមេសា ឆ្នាំ ២០២២ តែបើមើលលើលទ្ធផលការងារមកដល់ពេលនេះ នឹងមិនរួចទាន់គ្រោងការនោះទេ។
លោកបានណែនាំឲ្យក្រុមហ៊ុនកូរ៉េដែលទទួលខុសត្រូវ ត្រូវតែពន្លឿនការងារ បន្ថែមគ្រឿងចក្រ និងកម្លាំងកម្មករ បើទោះបីការងារអាចយឺតជាផែនការបន្តិចក៏ដោយ។
ផ្លូវជាតិលេខ ២ ដែលមានប្រវែងសរុបចំនួន៦២,៥៦គីឡូម៉ែត្រ គិតចាប់ពីរង្វង់មូលតាខ្មៅ-អូរចំបក់ ដល់រង្វង់មូលក្រុងដូនកែវ ខេត្តតាកែវ និងផ្លូវជាតិលេខ ២២ មានប្រវែងសរុបចំនួន ៩,៦១ គីឡូម៉ែត្រ ចាប់គិតពីរង្វង់មូលក្រុងដូនកែវ ដល់អង្គតាសោមផ្លូវជាតិលេខ ៣ ទទួលខុសត្រូវស្ថាបនាដោយក្រុមហ៊ុនកូរ៉េ Hanshin ដែលប្រើប្រាស់រយៈពេល៣០ខែ គ្រោងបញ្ចប់នៅខែមេសា ឆ្នាំ២០២២។
ក្រុមហ៊ុនកូរ៉េមួយនេះ តែងតែទទួលបានគម្រោងលើការស្ថាបនាផ្លូវជាតិមួយចំនួន ដែលបានមកពីកម្ចីថវិកាពីរដ្ឋាភិបាលកូរ៉េ។ កន្លងទៅក្រុមហ៊ុនក៏ធ្លាប់ទទួលខុសត្រូវក្នុងការស្ថាបនាផ្លូវជាតិលេខ ២១ ពីខេត្តកណ្តាលទៅស្រុកកោះធំព្រំដែនវៀតណាម សាងសង់ខុសបច្ចេកទេស ហើយក្រសួងសាធារណការធ្លាប់រិះគន់ជាញឹកញាប់ រហូតដល់នាយកក្រុមហ៊ុនធំនៅប្រទេសកូរ៉េ ចេញមុខទទួលខុសត្រូវពីកំហុសបច្ចេកទេសសាងសង់មិនមានគុណភាព៕
