ភ្នំពេញ​៖ ក្រសួង​សាធារណការ និង​ដឹកជញ្ជូន បាន​កំពុងអភិវឌ្ឍន៍ និង​ធ្វើឱ្យ​ទំនើប​នូវ ប្រព័ន្ធ​ទិន្នន័យ អេឡិចត្រូនិក នៅ​កំពង់ផែ ក្នុង​គោលបំណង សម្រួល ការបំពេញ​បែបបទ នាវា​ឆ្លងកាត់ ឱ្យ​កាន់តែ​ងាយស្រួល និង​រហ័ស​។​ ​សូមជម្រាបថាៈ រយៈពេល​កន្លងមក ការបំពេញ​បែបបទ នាវា​ឆ្លងកាត់​ភ្នាក់ងារ នាវាចរណ៍ ត្រូវធ្វើឡើង​ជាមួយ អាជ្ញា​ធរមាន​សមត្ថកិច្ច ដោយ​ត្រូវ​ចំណាយពេល រង់ចាំ​យូ មានការ​លំបាក និង​នីតិវិធី​ស្មុគស្មាញ ហេតុដូច្នេះ ទើប​ក្រសួង​សាធារណការ និង​ដឹកជញ្ជូន ក៏ដូចជា រាជរដ្ឋាភិបាល បាន​គិតគូរ​ប្រកបដោយ ចក្ខុវិស័យ​វែងឆ្ងាយ ក្នុងការ​វិវឌ្ឍន៍​ខ្លួន ទៅជា​រាជរដ្ឋាភិបាល អេឡិចត្រូនិក ដើម្បី​ជួយ​សម្រួល​ដល់ ការធ្វើ​បែបបទ​នាវាចរណ៍ ចូល​-​ចេញ ឆ្លងកាត់​មាន​ភាពងាយស្រួល​ចំណេញ ពេលវេលា មាន​ប្រសិទ្ធភាព និង​តម្លាភាព ស្របតាម​យុគសម័យ បដិវត្តន៍​ឧស្សាហកម្ម ៤.០​។​ ​ទាក់ទង​នឹង​គម្រោង​នេះ លោក រស់ វណ្ណា រដ្ឋលេខាធិការ ក្រសួង​សាធារណការ និង​ដឹកជញ្ជូន កាលពី​ថ្ងៃទី​៣១ ខែសីហា​បាន​ដឹកនាំ​កិច្ចប្រជុំ​ប្រចាំខែ​ស្ដីពី​វឌ្ឍនភាព គម្រោង ប្រព័ន្ធ​ផ្លាស់ប្ដូរ​ទិន្នន័យ អេឡិចត្រូនិក នៅ​កំពង់ផែ (Port EDI) តាមរយៈ ប្រព័ន្ធ​វីដេអូ​ពី​ចម្ងាយ​។​ ​កិច្ចប្រជុំ បាន​ពិភាក្សា​ពី​វឌ្ឍនភាព នៃ​គម្រោង ព្រមទាំង​ប្រមូល​ធាតុ​ចូល​គំនិត យោបល់ ដើម្បី​ធ្វើឱ្យ​ប្រព័ន្ធ ទិន្នន័យ​អេឡិចត្រូនិក កាន់តែ​ទំនើប ឆាប់រហ័ស និង​មាន​ប្រសិទ្ធភាព​៕