ក្រសួងសាធារណការ និងដឹកជញ្ជូនបានលក់ស្លាកលេខពិសេសចំនួន ៥.៧០០ ផ្លាកនិងប្រមូលបាន​ប្រាក់សរុបចំនួន ១១ លានដុល្លារ។ នេះត្រូវបានឲ្យដឹងកាលពីថ្ងៃសៅរ៍ដោយលោកទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន លើថវិកាដែលប្រមូលបាននៅចន្លោះថ្ងៃទី ៧ ខែមករាឆ្នាំមុន ដល់ពាក់កណ្តាលខែមិថុនាឆ្នាំនេះហើយនឹងត្រូវបញ្ចូលទៅក្នុងថវិកាជាតិ។ លោកបន្តថាចាប់តាំងពីថ្ងៃទី ៧ ខែមករាឆ្នាំមុនក្រសួងបានដាក់ចេញនូវស្លាកលេខពិសេស ដើម្បីបង្កើតជម្រើសជាច្រើនសម្រាប់ម្ចាស់យានយន្តដែលត្រូវការស្លាកលេខពិសេសផ្ទាល់ខ្លួន ឬការដេញថ្លៃដែលផ្តល់ជូនដោយក្រសួង។ លោកបន្ថែមថា៖ «តាមរយៈការធ្វើដូចនេះ យើងអាចប្រមូលថវិការចំនួន ១១ លានដុល្លារដែលជាចំណូលដ៏ល្អសម្រាប់ប្រទេសជាតិ ជាពិសេសអំឡុងពេលមានការផ្ទុះឡើងនៃជំងឺកូវីដ-១៩»។ លោកថាម្ចាស់យានយន្តមានជម្រើសក្នុងការដាក់ពាក្យសុំទិញស្លាកលេខ ឬដេញថ្លៃនៅក្នុងប្រព័ន្ធចុះបញ្ជីយានយន្តដោយស្វ័យប្រវត្តិនៅឯគេហទំព័រ vehicle.mpwt.gov.kh។ យោងតាមក្រសួងស្លាកលេខរថយន្តមានតម្លៃចាប់ពី ៥០០ ដុល្លារទៅ ២៥០.​០០០ ដុល្លារ ដោយស្លាកលេខពិសេសមួយចំនួនអាចមានតម្លៃថ្លៃជាងនេះ។ ការកំណត់តម្លៃ និងការដេញថ្លៃជាសាធារណៈគឺផ្អែកលើកត្តាដូចជាចំនួនតួរលេខ ពាក្យជាអក្សរអង់គ្លេស លេខដូចគ្នា​ ជាប់គ្នា លេខ ឬអក្សរដែលមានតែមួយគត់ និងចំនួនលេខសេស ឬគូ។ ស្លាកលេខផ្ទាល់ខ្លួនត្រូវបានបោះពុម្ពជាអក្សរ «កម្ពុជា» ដែលមានអក្សរខ្មែរនៅផ្នែកខាងលើនិង «Cambodia» ជាភាសាអង់គ្លេសនៅខាងក្រោម។ បន្សំនៃលេខ ឬអក្សរឡាតាំងពីមួយទៅប្រាំបីត្រូវបានបោះពុម្ពនៅកណ្តាល។ ស្លាកលេខផ្ទាល់ខ្លួននីមួយៗក៏មានលេខកូដ QR នៅផ្នែកខាងស្តាំដែលបញ្ជាក់ពីព័ត៌មានរបស់យានយន្តផងដែរ។