ថ្ងៃអង្គារ ៦កើត ខែបឋមាសាឍ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី១៥ ខែមិថុនា ឆ្នាំ២០២១ នៅទីស្តីការក្រសួង លោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកវិទ្យាស្ថាន បានអញ្ជើញដឹកនាំកិច្ចប្រជុំបូកសរុបសកម្មភាព និងវឌ្ឍនភាពការងារ វិទ្យាស្ថានតេជោសែន សាធារណការ និងដឹកជញ្ជូន ដោយមានការអញ្ជើញចូលរួមពីឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន ព្រមថ្នាក់ដឹកនាំ និងមន្ត្រីពាក់ព័ន្ធផងដែរ។ សូមជម្រាបជូនថា៖ វិទ្យាស្ថានតេជោសែន សាធារណការ និងដឹកជញ្ជូន ត្រូវបានសម្ពោធដាក់ឱ្យប្រើប្រាស់ ជាផ្លូវការនៅថ្ងៃទី២២ ខែមករា ឆ្នាំ២០២១ ក្រោមអធិបតីភាពដ៍ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបានបើកបវេសនកាលសិក្សាកាលថ្ងៃទី១៩ ខែមីនា ឆ្នាំ២០២១ ក្រោមអធិបតីភាពរបស់ឯកឧត្តមទេសរដ្ឋមន្ត្រី ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន ដោយមាននិសិ្សតជំនាន់ទី១ ចំនួន ១៩១នាក់ ក្នុងនោះរួមមាន៖ និសិ្សតអាហារូបករណ៍១០០% ចំនួន៣៩នាក់ និងនិស្សិតអាហារូបករណ៍ ៥០%ចំនួន៥៥នាក់ សិក្សាលើជំនាញចំនួន ៦ ក្នុងដេប៉ាតឺម៉ង់ចំនួន៣។ គួរកត់សម្គាល់ថា៖ ក្រសួងបង្កើតវិទ្យាស្ថាននេះឡើង ដើម្បីអភិវឌ្ឍធនធានមនុស្ស បណ្តុះបណ្តាលវិស្វករ កម្ពុជាឱ្យចេះធ្វើផ្លូវ សង់ស្ពានឆ្លងទន្លេ និងប្រព័ន្ធហេដ្ឋារចនាសម្ព័ន្ធឱ្យមានគុណភាពរឹងមាំសម្រាប់កូនខ្មែរជំនាន់ក្រោយ និងមានសមត្ថភាពដូចបុព្វបុរសសម័យមុន ដែលមានសមត្ថភាពអាចកសាងប្រាង្គប្រាសាទដ៏ស្រស់បំព្រង និងមានគុណភាពរឹងមាំជាប់បានយូររាប់រយឆ្នាំ និងល្បីល្បាញពាសពេញសកលលោកថែមទៀតផង។ កិច្ចប្រជុំនេះបានពិភាក្សាពីការងារគ្រប់គ្រង និងការយកចិត្តទុកដាក់លើការអប់រំពីសំណាក់គ្រូបង្រៀននៅវិទ្យាស្ថាន ការបង្កើតយុទ្ធសាស្រ្ដផ្អែកតាមតម្រូវការសិក្សារបស់សិស្សនិស្សិត ចំណេះដឹងនិងជំនាញពាក់ព័ន្ធ គរុកោសល្យ សីលធម៌ សាមគ្គីភាពភាពរបស់គ្រូបង្រៀន ជាដើម។ ជាកិច្ចចាប់ផ្តើមនៃកិច្ចប្រជុំ លោកជំទាវប្រធានអង្គប្រជុំ បានសម្តែងនូវការអបអរសាទរចំពោះឯកឧត្តម ហឿន សំនៀង ដែលទើបទទួលបានការទុកចិត្តពីព្រះមហាក្សត្រខ្មែរ ព្រះករុណា ព្រះបាទសម្តេច ព្រះបរមនាថនរោត្តម សីហមុនី បានសព្វព្រះរាជហឫទ័យត្រាស់បង្គាប់តែងតាំងជានាយកវិទ្យាស្ថាន «តេជោសែន សាធារណការ និងដឹកជញ្ជូន» ដែលជាវិទ្យាស្ថានបណ្តុះបណ្តាលលើជំនាញសាងសង់ផ្លូវ ថ្នល់ និងស្ពានដំបូងគេនៅកម្ពុជា។ ជាមួយគ្នានោះផងដែរ លោកជំទាវប្រធានអង្គប្រជុំបានជំរុញលើកទឹកចិត្តឱ្យមន្ត្រីក្រោមឱវាទខិតខំប្រឹង ប្រែងបំពេញការងាររួមគ្នាប្រកបដោយការទទួលខុសត្រូវខ្ពស់ មានសាមគ្គីភាព និងសហការល្អ ដើម្បី បង្កើនធនធានមនុស្សសម្រាប់ការអភិវឌ្ឍសង្គមជាតិ ជាពិសេសលើវិស័យហេដ្ឋារចនាសម្ព័ន្ធ ដែលជា បំណងប្រាថ្នាដ៏ធំធេងរបស់រាជរដ្ឋាភិបាលកម្ពុជា។ ជាងនេះទៅទៀត លោកជំទាវ បានសម្តែងនូវជំនឿយ៉ាងមុតមាំថា៖ សិស្សនិស្សិតខ្មែរ នឹងមានសមត្ថភាព គ្រប់គ្រាន់ក្នុងការកសាងហេដ្ឋារចនាសម្ព័ន្ធដឹកជញ្ជូននៅកម្ពុជាបានយ៉ាងមានប្រសិទ្ធភាព និងគុណភាព រឹងមាំ ក្រោយពីបានបញ្ចប់ការសិក្សាជំនាញឯកទេសនៅក្នុងវិទ្យាស្ថាននេះ។ លោកជំទាវបានសង្កត់ធ្ងន់បន្ថែមទៀតថា៖ វិទ្យាស្ថានតេជោសែន សាធារណការ និងដឹកជញ្ជូន នឹងផ្ដល់ ចំណេះដឹងខាងបច្ចេកទេសដល់សិស្សនិស្សិតរបស់យើង ដើម្បីក្លាយខ្លួនជាអ្នកមានចំណេះដឹងពិតប្រាកដ ចេះទាំងទ្រឹស្ដី ទទួលបានទាំងបទពិសោធន៍ មានគុណធម៌ សីលធម៌ អាចរស់នៅក្នុងសង្គមបាន ជា ទំពាំងស្នងឫស្សី អាចក្លាយខ្លួនជាអ្នកដឹកនាំបន្តវេន និងចូលរួមកសាងធនធានមនុស្សបានផងដែរ។ ជាទីបញ្ចប់ លោកជំទាវ បានថ្លែងអំណរគុណយ៉ាងជ្រាលជ្រៅចំពោះឯកឧត្តម ហឿន សំនៀង នាយក វិទ្យាស្ថានតេជោសែន សាធារណការ និងដឹកជញ្ជូន និងក្រុមការងាររបស់វិទ្យាស្ថាន ដែលបានចូលរួម ចំណែកក្នុងការដឹកនាំនិងគ្រប់គ្រងវិទ្យាស្ថាននាពេលកន្លងមក និងដែលបានខិតខំប្រឹងប្រែងបំពេញការងារអស់ពីកម្លាំងកាយចិត្ត ដើម្បីលើកកម្ពស់វិស័យធនធានមនុស្សឱ្យមានការរីកចម្រើន៕