កាលពីពេលថ្មីៗ គ្រប់គ្នាប្រាកដជាបានដឹងហើយអំពីផ្លូវ​ជាតិ​លេខ១០ ដែលជាផ្លូវជាតិ Highway មួយខ្សែប្រភេទ DBST ដែល​មាន​ប្រវែង១៩៧,៣៦ គីឡូម៉ែត្រ ដោយ​ត​ភ្ជាប់​រវាង​ស្រុក​សំឡូត​ខេត្ត​បាត់ដំបង កាត់​តាម​ស្រុកវាលវែង ខេត្ត​ពោធិ៍សាត់ និង​មក​ដល់​ទី​រួម​ខេត្ត​កោះកុង ហើយគិតមកត្រឹមពាក់កណ្តាលខែឧសភានេះ សម្រេចបាន ៤៨,៧៧%ហើយ។ ប៉ុន្តែមានចំណុចមួយប្រហែលជាគ្រប់គ្នាមិនសូវបានដឹងនោះគឺ ផ្លូវជាតិលេខ១០ថ្មីនេះ គឺជាផ្លូវល្បឿនលឿនមួយដែលមានការ​ពិបាក​ក្នុងការ​សាងសង់ ហើយក្នុងនោះគឺមានការសាងសង់ស្ពានអាតៃប្រវែង ៥១២ម៉ែត្រ និងកម្ពស់ដល់ ៧៥ម៉ែត្រ ដែលជាស្ពានខ្ពស់​ជាងគេបំផុត​នៅកម្ពុជា។ ដោយការសាងសង់ស្ពានដ៏ខ្ពស់ជាងគេនេះ គឺនៅត្រង់ចំណុច ទឹកដីឃុំអូរសោមស្រុកវាលវែងនៃខេត្តពោធិសាត់។ គួររម្លឹកផងដែរថា៖ ផ្លូវនេះគ្រោងចំណាយប្រមាណ​ជាង ១៨៨លានដុល្លារ ជាហិរញ្ញប្បទានរបស់ប្រទេសចិន និងថវិកាបដិភាគរបស់​រាជរដ្ឋាភិបាលកម្ពុជា។ នេះបើយោងតាមឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តី​ក្រសួងសាធារណការ និងដឹកជញ្ជូន បាន​ថ្លែងឱ្យដឹងក្នុងពីធីបើកគម្រោងសាងសង់​ផ្លូវជាតិលេខ១០ កាលពីខែមីនា ឆ្នាំ​២០២០ កន្លងទៅនេះ។