គម្រោងស្ថាបនាផ្លូវ៣៤ខ្សែ ដែលជាសម្ធិទផលដ៏ធំរបស់ខេត្តព្រះសីហនុ នឹងដាក់សម្ពោធឱ្យប្រើប្រាស់ជាផ្លូវការនៅចុងខែមីនា ក្នុងឆ្នាំ២០២១ នេះមុនពេលពិធីបុណ្យចូលឆ្នាំថ្មីប្រពៃណីជាតិខ្មែរចូលមកដល់។ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានជម្រុញឱ្យក្រុមហ៊ុននីមួយៗបង្កើនការងារឱ្យបានទ្វេដង ដើម្បីធ្វើយ៉ាងណាឱ្យការងារដែលនៅសេសសល់ត្រូវបញ្ចប់នៅចុងខែមីនា ឆ្នាំ២០២១ខាងមុខ ដើម្បីរៀបចំសម្ពោធដាក់ឱ្យប្រើប្រាស់ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ក្នុងខែមេសា ឆ្នាំ២០២១ ។ នៅក្នុងកិច្ចប្រជុំពិភាក្សាត្រួតពិនិត្យវឌ្ឍនភាពនៃការស្ថាបនាផ្លូវ បន្ទប់ទឹកសាធារណៈ អាងប្រព្រឹត្តកម្ម ការអ៊ុតបេទីម ការបំពាក់អំពូលបំភ្លឺផ្លូវ បំពាក់កាំមេរ៉ាសុវត្ថិភាព ការគូសគំនូរចរាចរណ៍ បំពាក់ភ្លើងចរាចរណ៍ នៅលើដងផ្លូវទាំង ៣៤ខ្សែ ក្នុងខេត្តព្រះសីហនុ ក្រុមហ៊ុននីមួយៗបានសន្យាពន្លឿនសកម្មភាពការងាររបស់ខ្លួនឱ្យរួចរាល់ត្រឹមថ្ងៃទី១៥ ខែមីនា ឆ្នាំ២០២១ ដោយឡែកការងារគូសគំនូសចរាចរណ៍គ្រោងបញ្ចប់ការងាររបស់ខ្លួននៅចុងខែមីនាខាងមុខ ។ ឯកឧត្តម គួច ចំរើន បានថ្លែងអំណ អរគុណដល់ក្រុមហ៊ុនទាំងអស់បានសន្យាកែសម្រួលពេលវេលា ដោយយកចិត្តទុកដាក់អនុវត្តបន្ថែមម៉ោងការងារដោយការទទួលខុសត្រូវខ្ពស់ ម្យ៉ាងទៀតក្រុមហ៊ុនត្រូវសំអាតសំណល់ចេញពីការដ្ឋានរៀងៗខ្លួនដែលនៅសេសសល់។ សូមជម្រាបជូនថា៖ មិនត្រឹមតែគម្រោងស្ថាបនាផ្លូវ៣៤ខ្សែ តែប៉ុណ្ណោះទេ រាជរដ្ឋាភិបាលក៏បានទម្លាក់កញ្ចប់ថវិកាស្ថាបនាដោយប្រើប្រាស់ថវិកាសន្សំរបស់ជាតិ ចំនួន ១០០ លានដុល្លារ តាមរយៈក្រសួងសាធារណការ និងដឹកជញ្ជូន លើការស្ថាបនាផ្លូវចំនួន១១ខ្សែបន្ថែមទៀត ដែលផ្លូវទាំង១១ខ្សែនេះ មានប្រវែងជាង ៥៨គីឡូម៉ែត្រ នឹងទទួលលទ្ធផលសម្រេចបាន ២១ភាគរយហើយ ជាសមិទ្ធផលថ្មីដែលប្រជាពលរដ្ឋនៅក្រុងព្រះសីហនុ និងមួយផ្នែកទៀតនៅស្រុកព្រៃនប់និងស្រុកស្ទឹងហាវទទួលបានសមិទ្ធផលទាំងផ្លូវ៣៤ខ្សែនិង១១ខ្សែបន្ថែមទៀត។