តាកែវ៖ អភិបាលខេត្តតាកែវ លោក អ៊ូច ភា បានបញ្ជាឱ្យមន្ទីរសាធារណការ និងដឹកជញ្ជូនខេត្ត ត្រូវអនុវត្តនីតិវិធីបិទយានដ្ឋានកែច្នៃខុសលក្ខណៈបច្ចេកទេស ដែលជាប្រភពនៃការកែច្នៃយានយន្តដឹកជញ្ជូនលើសទម្ងន់កម្រិតកំណត់ នាំឲ្យខូចខាតផ្លូវថ្នល់ ស្ពាន និងបង្កគ្រោះថ្នាក់ចរាចរណ៍។ ការដាក់ចេញបទបញ្ជានេះ បានធ្វើឡើងក្នុងពិធីបូកសរុបលទ្ធផលការងារ អនុគណៈកម្មការសុវត្ថិភាពចរាចរណ៍ផ្លូវគោកខេត្តតាកែវ ប្រចាំខែធ្នូ និងប្រចាំឆ្នាំ២០២០ និងលើកទិសដៅអនុវត្តបន្ត ឆ្នាំ២០២១នេះ ដែលប្រព្រឹត្តទៅនៅថ្ងៃទី១១ ខែមករានេះ។ ក្នុងឱកាសនោះ លោក អ៊ូច ភា បានថ្លែងអំណរគុណ និងការកោតសរសើរកងកម្លាំងសមត្ថកិច្ច ក៏ដូចជាមន្ត្រីជំនាញពាក់ព័ន្ធទាំងអស់ ដែលបានខិតខំប្រឹងប្រែងអនុវត្តការងារប្រកបដោយជោគជ័យកន្លងមក និងបានជំរុញលើកទឹកចិត្តឲ្យក្រុមការងារខិតខំប្រឹងប្រែងការងារបន្តទៀត ដើម្បីឲ្យខេត្តតាកែវ ក៏ដូចជាប្រទេសកម្ពុជា កាត់បន្ថយបាននូវគ្រោះថ្នាក់ចរាចរណ៍។ លើសពីនេះ លោកអភិបាលខេត្ត ក៏បានស្នើសុំឲ្យសមត្ថកិច្ចពាក់ព័ន្ធ ក្នុងពេលត្រួតពិនិត្យយានយន្តដឹកជញ្ជូនតាមដងផ្លូវ ត្រូវបង្កើនការត្រួតពិនិត្យវិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត ប័ណ្ណបើកបរ ប័ណ្ណសម្គាល់យានយន្ត ការផាកពិន័យរថយន្តដឹកលើសទម្ងន់ រថយន្តដឹកសំពីងសំពោង ត្រួតពិនិត្យគ្រឿងញៀន ឬជាតិអកុល។ល។ ដើម្បីធានាសុវត្ថិភាព ក៏ដូចជាបង្ការបញ្ហាគ្រោះថ្នាក់ចរាចរណ៍របស់ប្រជាពលរដ្ឋ។ ទន្ទឹមនឹងនោះ លោក អ៊ូច ភា ក៏បានជំរុញឱ្យបន្តធ្វើយុទ្ធនាការផ្សព្វផ្សាយអំពីច្បាប់ចរាចរណ៍ផ្លូវគោកបន្ថែមទៀតដល់ប្រជាពលរដ្ឋនៅតាមសាលារៀន ទីប្រជុំជន ឲ្យពួកគាត់ចូលរួមគោរពច្បាប់ចរាចរណ៍ទាំងអស់គ្នា បើកបរម៉ូតូត្រូវពាក់មួកសុវត្ថិភាព ជិះរថយន្តត្រូវពាក់ខ្សែរក្រវ៉ាត់ ព្រមទាំងធ្វើការបិទចំណាំងផ្លាតសុវត្ថិភាព (ស្ទីគ័រចំណាំងផ្លាតពន្លឺពេលយប់) ដល់គោយន្ត ឬ រថយន្ត ម៉ូតូ ដើម្បីការពារអាយុជីវិតអ្នកបើកបរពេលយប់ពីគ្រោះថ្នាក់ចរាចរណ៍ ដែលអាចកើតឡើងជាយថាហេតុ៕