កម្មវិធីបណ្ដុះបណ្ដាលស្ដីពីជំនាញនៃការចរចាដើម្បីពង្រឹង និងលើកកម្ពស់សមត្ថភាពមន្ត្រីអំពីសារៈ សំខាន់នៃការប្រាស្រ័យទាក់ទងនិងជំនាញអន្តរបុគ្គល ត្រូវបានបិទបញ្ចប់ ថ្ងៃសុក្រ ៨កើត ខែអស្សុជ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៥ ខែកញ្ញា ឆ្នាំ២០២០ នៅ ទីស្ដីការក្រសួងមានរៀបចំពិធីបិទកម្មវិធីបណ្ដុះបណ្ដាលស្ដីពីជំនាញនៃការចរចា ក្រោមអធិបតីភាពលោក ជាម សុវណ្ណនី អគ្គនាយករងនៃអគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងសាធារណការ និងដឹក ជញ្ជូន ដោយមានការចូលរួមពីថ្នាក់ដឹកនាំក្រសួង និងមន្ត្រីពាក់ព័ន្ធក្រោមឱវាទក្រសួង។ កម្មវិធីបណ្ដុះបណ្ដាលនេះបានប្រព្រឹត្តទៅតាមប្រព័ន្ធវីដេអូពីចម្ងាយចាប់ពីថ្ងៃទី១៤ ដល់ថ្ងៃទី២៥ ខែកញ្ញា ឆ្នាំ២០២០ សហការរៀបចំឡើងក្រោមការគាំទ្រពីមូលនិធិពិសេសនៃកិច្ចសហប្រតិបត្តិការមេគង្គឡានឆាង ក្រសួងការបរទេសថៃ សហការជាមួយវិទ្យាស្ថានមេគង្គដែលជាភ្នាក់ងារអនុវត្តគម្រោង និងក្រសួងសាធារណការ និងដឹកជញ្ជូន រួមជាមួយនឹងទីភ្នាក់ងារសម្របសម្រួលកិច្ចសហប្រតិបត្តិការមេគង្គឡានឆាងផងដែរ។ កម្មវិធីបណ្ដុះបណ្ដាលនេះមានគោលបំណងបង្កើនការយល់ដឹងអំពីជំនាញចរចា ដើម្បីទទួលបាន លទ្ធផលឈ្នះ-ឈ្នះសម្រាប់ភាគីចរចា ពង្រឹងសមត្ថភាពឲ្យយល់អំពីអាទិភាព និងដំណើរការសម្រាប់ ការចរចាប្រកបដោយប្រសិទ្ធភាព និងលើកកម្ពស់ការយល់ដឹងអំពីសារៈសំខាន់នៃការប្រាស្រ័យទាក់ទង ប្រកបដោយភាពជំនាញអន្តរបុគ្គល។ ថ្លែងក្នុងសន្ទរកថាបិទកម្មវិធី លោកអគ្គនាយករង បានជំរុញលើកទឹកចិត្តឱ្យមន្ត្រីដែលជាសិក្ខាកាមក្នុង កម្មវិធីបណ្តុះបណ្តាលនេះ យកចំណេះដឹង និងបទពិសោធន៍ ក៏ដូចជាការអនុវត្តល្អៗដែលទទួលបានពីគ្រូទៅអនុវត្តនៅក្នុងអង្គភាពរបស់ខ្លួនរៀងៗខ្លួនប្រកបដោយប្រសិទ្ធភាព៕