ឯកឧត្តមទេសរដ្ឋមន្ត្រី ស៊ុន ចាន់ថុល បានដឹកនាំគណៈប្រតិភូក្រសួងអញ្ជើញគោរពវិញ្ញាណក្ខន្ធ លោក ស៊ីន សេដ្ឋកុល ដែលត្រូវជាចៅបង្កើតលោកតា ស៊ីន ស៊ីសាមុត អធិរាជសំឡេងមាស --- ថ្ងៃអង្គារ ៦កើត ខែបុស្ស ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី៣១ ខែធ្នូ ឆ្នាំ២០១៩ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង អញ្ជើញគោរពវិញ្ញាណក្ខន្ធ លោក ស៊ីន សេដ្ឋកុល ដែលបានទទួលមរណភាពកាលពីថ្ងៃចន្ទ ៥កើត ខែបុស្ស ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី៣០ ខែធ្នូ ឆ្នាំ២០១៩ វេលាម៉ោង១៧ និង៣០នាទី ក្នុងវ័យ៣៨ឆ្នាំ ដោយសារជំងឺដាច់សសៃឈាមខួរក្បាល។ មរណភាពរបស់លោក ស៊ីន សេដ្ឋកុល គឺជាការបាត់បង់នូវឪពុកបង្កើតជាទីគោរពស្រឡាញ់ដ៏ជ្រាល ជ្រៅរបស់ក្រុមគ្រួសារ ដែលប្រកបដោយព្រហ្មវិហារធម៌ និងសណ្តោសប្រោសប្រណីចំពោះកូនទាំងអស់ ហើយសូមឧទ្ទិសបួងសួងដល់វត្ថុស័ក្តិសិទ្ធទំាងអស់ ជួយលើកស្ទួយដួងវិញ្ញាណក្ខន្ធរបស់លោក បានសោយសុខក្នុងសុគតិភពជានិច្ចនិរន្តរ៍។ លោក ស៊ីន សេដ្ឋកុល ត្រូវជាចៅបង្កើតលោកតា ស៊ីន ស៊ីសាមុត អធិរាជសំឡេងមាស និងជាកូនបង្កើតរបស់លោក ស៊ីន ចន្ទសាយ៉ា ដែលបានស្លាប់បាត់បង់ជីវិតដោយជំងឺដូចគ្នានេះកាលពីប៉ុន្មានឆ្នាំមុន។ សូមជម្រាបជូនថា៖ កាលពីថ្ងៃទី១៤ ខែវិច្ឆិកា ឆ្នាំ២០១៥កន្លងទៅ មានការរៀបចំព្រឹត្តិការណ៍ប្រគំតន្ត្រីមួយដ៏ធំ នៅរោងមហោស្រពកោះពេជ្រ ដើម្បីឱ្យប្រជាជនខ្មែរមានឱកាសបានសម្តែងនូវការកោតសរសើររបស់ខ្លួន និងចូលរួមវិភាគទានដល់ក្រុមគ្រួសារលោកតា ស៊ីន ស៊ីសាមុត ក៏ដូចជាដើម្បីអភិរក្សបទចម្រៀងដែលជាស្នាដៃដើមផងដែរ៕