ភ្នំពេញៈ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងថា កំណើនសេដ្ឋកិច្ចកម្ពុជា ប្រចាំឆ្នាំ ប្រកបដោយស្ថេរភាព បានធ្វើឲ្យប្រជាពលរដ្ឋខ្មែរ មានជីវភាពធូរធារ ដែលនេះជាកត្តា ជំរុញឲ្យតម្រូវការ ប្រើប្រាស់ទឹក ក៏ដូចសម្ភារៈផ្សេងៗ មានការកើនឡើង ព្រមទាំងធ្វើឲ្យមានការហូរចូលនូវវិនិយោគចម្រុះ។ ក្នុងឱកាសចុះពិនិត្យវឌ្ឍនភាព នៃការសាងសង់ស្ថានីយប្រព្រឹត្តិកម្មទឹកកខ្វក់ ស្ថានីយបូមទឹកកខ្វក់ ការតបណ្ដាញលូ និងការស្ដារ នៅក្រុងតាខ្មៅ កាលពីថ្ងៃទី១២ ខែមិថុនា ឆ្នាំ២០១៩ លោក ស៊ុន ចាន់ថុល មានប្រសាសន៍ថា “កំណើនសេដ្ឋកិច្ចរបស់កម្ពុជាប្រចាំឆ្នាំ ប្រកបដោយស្ថេរភាព និងរឹងមាំ បានធ្វើឱ្យប្រជាពលរដ្ឋមានជីវភាពធូរធារ ដែលជាកត្តាជំរុញឲ្យតម្រូវការប្រើប្រាស់ទឹកក៏ដូចសម្ភារៈផ្សេងៗមានការកើនឡើងព្រមទាំងធ្វើឲ្យមានការហូរចូលនូវវិនិយោគចម្រុះរួមមាន ៖ ការសាងសង់អគារ ខុនដូ រមណីយដ្ឋាន និងអគារពាណិជ្ជកម្ម ព្រមទាំងរោងចក្រកាត់ដេរជាច្រើន នៅក្រុងតាខ្មៅ ខេត្តកណ្ដាល ដែលធ្វើឲ្យបរិមាណទឹកកខ្វក់ មានការកើនឡើងផងដែរ”។ ឆ្លៀតឱកាសនោះដែរ រដ្ឋមន្រ្តីសាធារណការ លើកឡើងថា អាងប្រព្រឹត្តិកម្មទឹកកខ្វក់នេះ មានសមត្ថភាពចម្រោះទឹកកខ្វក់បានចំណុះ៧៦០០ម៣/ថ្ងៃ ចំណែកឯស្ថានីយ បូមទឹកកខ្វក់ទាំង១០ទីតាំង មានសមត្ថភាពបូមបាន២៩៩៥២ម៣/ថ្ងៃ។ លោករដ្ឋមន្ដ្រីបន្ដថា ការស្ថាបនាស្ថានីយ ប្រព្រឹត្តិកម្មទឹកកខ្វក់ ស្ថានីយបូមទឹក ការតបណ្ដាញលូ ពីផ្ទះពលរដ្ឋ និងការស្ដារស្ទឹង គឺធ្វើឡើងក្រោមគម្រោងកម្ចីឥណទានសម្បទាន របស់ធនាគារនីហរ័ណ អាហរ័ណកូរ៉េ នូវទឹកប្រាក់ប្រមាណ៦៤លានដុល្លារ ក្នុងគោលបំណងដើមរក្សាបាននូវសុខុមាលភាពរបស់ពលរដ្ឋ អនាម័យល្អ បរិស្ថានស្រស់បំព្រង ការពារទឹកជំនន់ និងការទាក់ទាញភ្ញៀវទេសចរ ក៏ដូចជាវិនិយោគិនជាតិ និងអន្តរជាតិផងដែរ៕