គំរូផែនទី​នៃគម្រោង​ផ្លូវល្បឿនលឿន​ភ្នំពេញ-សៀមរាប ត្រូវបានបង្ហាញ​ចេញ​ក្នុងកិច្ចប្រជុំ​ស្តីពីការ​ចូលរួម​ផ្តល់ព័ត៌មាន​បច្ចេកទេស​លើគម្រោង​សិក្សា​ផ្លូវល្បឿនលឿន​នេះ។ កិច្ចប្រជុំ​នេះ ធ្វើឡើង​កាលពីថ្ងៃទី២៥ ខែមេសា ឆ្នាំ​២០២៣ ដឹកនាំដោយ​ លោក ហេង វណ្ណនី អភិបាល​រងខេត្តកំពង់ចាម និងមាន​ការចូលរួមពី​នាយករដ្ឋបាល​សាលាខេត្ត​ មន្ទីរ-អង្គភាព​ជំនាញ មន្រ្តី​ពាក់ព័ន្ធ និងតំណាង​ក្រុមហ៊ុន​សាជីវកម្ម​ស្ពាន និង​ថ្នល់ចិន (CRBC)។ សូមជម្រាប​ថា គម្រោង​ផ្លូវល្បឿនលឿនទី៣នេះ នឹង​ចាប់ផ្តើម​ចេញពីរាជធានីភ្នំពេញ ឆ្លងកាត់​ខេត្តកណ្តាល កំពង់ចាម កំពង់ធំ និងសៀមរាប។ នេះបើតាម​លិខិត​ជូនដំណឹង​របស់​ក្រសួងសាធារណការ និង​ដឹកជញ្ជូន ផ្ញើទៅកាន់​អភិបាល​រាជធានី-ខេត្ត​ទាំង៥ កាលពីពេលថ្មីៗនេះ។ ក្រសួង​បាន​ស្នើឱ្យ​អភិបាលរាជធានី-ខេត្ត​ទាំង៥ ​ជួយអន្តរាគមន៍ សម្របសម្រួល​ដល់អង្គភាពពាក់ព័ន្ធ និងអាជ្ញាធរ​មូលដ្ឋាន​ក្នុងដែន​សមត្ថកិច្ច ដើម្បី​ចូលរួម​សហការ​ជាមួយ​ក្រុមហ៊ុន​សាជីវកម្មស្ពាន និង​ថ្នល់​ចិន ក្នុងការសិក្សា​លើគម្រោងផ្លូវល្បឿនលឿននេះ ឱ្យ​បានរលូន។ គួរដឹងដែរថា នៅថ្ងៃទី៧ ខែមិថុនា ឆ្នាំ​២០២៣ខាងមុខនេះ កម្ពុជា​នឹង​បើកការដ្ឋាន​សាងសង់​ផ្លូវល្បឿនលឿនទី២ ភ្នំពេញ-បាវិត ក្រោមអធិបតីភាព​សម្តេចតេជោ ហ៊ុន សែន៕