កំពង់ស្ពឺ៖ លោក ហ៊ុន ម៉ានី អ្នកតំណាងរាស្ត្រមណ្ឌលខេត្តកំពង់ស្ពឺ​ និងជាប្រធានគណកម្មាធិការទី៧នៃរដ្ឋសភា បានសម្ពោធដាក់ឱ្យប្រើប្រាស់ជាផ្លូវការនូវផ្លូវក្រាលកៅស៊ូ ផ្លូវបេតុង ចំនួន១៤ខ្សែ ប្រវែង ១៦៥.៦៣គីឡូម៉ែត្រ ស្ថិតនៅភូមិសេរីវ័ន្ត ឃុំមហាសាំង ស្រុកភ្នំស្រួច ខេត្តកំពង់ស្ពឺ នាព្រឹកថ្ងៃទី២៩ ខែមីនា ឆ្នាំ២០២៣។ លោក ហ៊ុន ម៉ានី បានឱ្យដឹងថា​ ផ្លូវ ១៦៥,៦៣គីឡូម៉ែត្រ ក្នុងខេត្តកំពង់ស្ពឺ ក្រោមគម្រោងសាងសង់របស់ក្រសួងអភិវឌ្ឍន៍ជនបទ ជំហានទី២។ នេះគឺជាកិច្ចខិតខំប្រឹងប្រែងថ្មីមួយទៀតរបស់ថ្នាក់ដឹកនាំ មន្ត្រីរាជការ ប្រជាពលរដ្ឋក្នុងខេត្ត ដែលបានចូលរួមអភិវឌ្ឍន៍សមិទ្ធផលថ្មីៗប្រកបដោយការទទួលខុសត្រូវខ្ពស់។​ សមិទ្ធិផលថ្មីដែលបាននិងកំពុងសម្ពោធដាក់ឱ្យប្រើប្រាស់​ នឹងបម្រើដល់ផលយោជន៍ប្រជាពលរដ្ឋទូទៅ។ អ្នកតំណាងរាស្ត្របានបន្តថា​ តាមរយៈនៃគម្រោងកែលម្អផ្លូវជនបទ​ ពិតជាបានចូលរួមក្នុងការអភិវឌ្ឍ​ និងជំរុញកំណើនសេដ្ឋកិច្ច សង្គមកិច្ច និងកាត់បន្ថយភាពក្រីក្រនៅកម្ពុជា​ ពិសេសប្រជាជនដែលរស់នៅតាមបណ្តោយផ្លូវទាំងអស់​ ព្រមទាំងអ្នកធ្វើដំណើរអាចកាត់បន្ថយក្នុងកម្រិតអតិបរមាពីការប៉ះពាល់ដល់សុខភាព។​ ជាងនេះទៅទៀតគម្រោងក៏បានផ្តល់នូវកាលានុវត្តយ៉ាងច្រើន ក្នុងការអភិវឌ្ឍលើវិស័យកសិកម្ម ឧស្សាហកម្ម អប់រំ ទេសចរណ៍ សុខាភិបាល និងសេវាសង្គមផ្សេងៗទៀត។ មិនតែប៉ុណ្ណោះប្រជាពលរដ្ឋនៅជនបទអាចទទួលបានផលដោយផ្ទាល់ពីគម្រោងនេះ​ ដោយអាចធ្វើដំណើរបានគ្រប់រដូវកាលទៅកាន់ទីកន្លែងផ្សេងៗ និងការដឹកជញ្ជូនកសិផលរបស់ពួកគាត់ទៅកាន់ទីផ្សារដើម្បីលក់ដូររកប្រាក់ចំណូលបន្ថែម​ បង្កើតឡើងនូវកាលានុវត្តភាពសង្គម សេដ្ឋកិច្ចនៅតំបន់ជនបទ​ និងជំរុញការធ្វើសមាហរណកម្មរវាងទីក្រុង​ និងជនបទឱ្យកាន់តែមានលក្ខណៈល្អប្រសើរឡើង សំដៅពង្រីកវិសាលភាពនិងកែលម្អគុណភាព សេវាសាធារណៈនៅតំបន់ជនបទ។ ជាមួយនឹងការដាក់សម្ពោធសមិទ្ធិផលផ្លូវ១៤ខ្សែ មានប្រវែងជាង១៦៥គីឡូម៉ែត្រនេះ អភិបាលខេត្តកំពង់ស្ពឺ​ លោក វ៉ី សំណាង បានថ្លែងអំណរគុណដល់ថ្នាក់ដឹកនាំគ្រប់ជាន់ថ្នាក់ សប្បុរសជន ដែលតែងតែគិតគូរពីប្រជាពលរដ្ឋ និងបានខិតខំកសាងសមិទ្ធផលនានាជូនដល់ប្រជាជនជាហូហែរ។​ សូមជម្រាបជូនថា ក្នុងក្របខ័ណ្ឌខេត្តកំពង់ស្ពឺ ក្រសួងអភិវឌ្ឍន៍ជនបទ​ បានសាងសង់ផ្លូវសរុបចំនួន ១៤ខ្សែ ប្រវែង ១៦៥.៦៣គីឡូម៉ែត្រ (ផ្លូវក្រាលកៅស៊ូ DBST ១៥៣.២៥ គីឡូម៉ែត្រ និងផ្លូវក្រាលកៅស៊ូ ផ្លូវបេតុង ១២. ៣៨គីឡូម៉ែត្រ) ឆ្លងកាត់ ២៥ឃុំ និង ៦ស្រុក សរុបថវិកា ១៥,១៥៤,០០០ (ដប់ប្រាំលានមួយរយហាសិបបួនពាន់) ដុល្លារ៕