ភ្នំពេញ៖ ការដ្ឋានសាងសង់ស្ពានបេតុងខ្សែកាបឫស្សីកែវ ស្របនឹងស្ពានបាឡេ ស្ថិតក្នុងខណ្ឌឫស្សីកែវ ភ្ជាប់ទៅតំបន់ អភិវឌ្ឍន៍ជ្រោយចង្វារ ខណ្ឌជ្រោយចង្វារ បានឈានដល់ការភ្ជាប់តួស្ពានហើយ នឹងគ្រោងបញ្ចប់នៅដើមខែមេសា ឆ្នាំ២០២៣។ នៅព្រឹកថ្ងៃទី១៦ ខែមករា ឆ្នាំ២០២៣ អភិបាលនៃគណៈអភិបាលរាជធានីភ្នំពេញ លោក ឃួន ស្រេង បានចូលរួមក្នុងពិធីភ្ជាប់ស្ពានបេតុងខ្សែកាបឆ្លងទន្លេសាប ស្ថិតនៅខណ្ឌឫស្សីកែវ និងខណ្ឌជ្រោយចង្វាររាជធានីភ្នំពេញ។ ស្ពាននេះសាងសង់ដោយក្រុមហ៊ុន OCIC ដោយប្រើរយៈពេលវេលា ២៨ខែ និងប្រើប្រាស់ថវិកាសាងសង់ចំនួន ៣៥លានដុល្លារអាមេរិក មកដល់ថ្ងៃនេះ ការដ្ឋានសាងសង់សម្រេចបាន ៩៣% នៃគម្រោង ដែលនឹងបញ្ចប់ទាំងស្រុងនៅដើមខែមេសា ឆ្នាំ២០២៣នេះ។ គួរឱ្យដឹងដែរថា ស្ពានបេតុងនេះត្រូវសាងសង់ចេញពីចំណុចឃ្លាំងស្តុកសាំងសូគីម៉ិច ផ្លូវជាតិលេខ៥ ឆ្លងកាត់ទន្លេសាប ទៅតំបន់អភិវឌ្ឍន៍ទីក្រុងរណបជ្រោយចង្វារ ដែលស្ថិតក្នុងសង្កាត់ព្រែកតាសេក ខណ្ឌជ្រោយចង្វារ។ ស្ពានខ្សែកាបនេះ មានប្រវែង ៦៤២ម៉ែត្រ ទទឹង ២០.៥ ម៉ែត្រ មានសសរទាញខ្សែកាបចំនួន៤ កំពស់ ៤០ម៉ែត្រ ធៀបនឹងកម្រាលស្ពាន។ ជាមួយគ្នានេះដែរ ក្រសួងសាធារណការ និងដឹកជញ្ជូនបានឱ្យដឹងថា ស្ពានថ្មីមួយខ្សែនេះនឹងជួយសម្រួលដល់ការដឹកជញ្ជូនទំនិញចេញពីខេត្តនានាមកកាន់រាជធានីភ្នំពេញ និងពីរាជធានីភ្នំពេញទៅកាន់ខេត្តនានា ដែលមានកំណើនជារៀងរាល់ឆ្នាំផងដែរ៕