គម្រោងស្ដារ និងលើកកម្រិតគុណភាពផ្លូវជាតិពីរខ្សែផ្សេងទៀត គឺផ្លូវជាតិលេខ៣១ និង៣៣ នៅក្នុងខេត្តកំពត និងកែប ត្រូវបានប្រកាសបើកការដ្ឋាន មួយថ្ងៃមុនបំណាច់ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ សម្តេចតេជោ នាយករដ្ឋមន្ត្រី នៃព្រះរាជាណាចក្រកម្ពុជា កំពត៖ ថ្ងៃសុក្រ ៨កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣០ ខែធ្នូ ឆ្នាំ២០២២ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានអញ្ជើញអមដំណើរសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីបើកការដ្ឋានគម្រោងស្ដារ និងលើកកម្រិតគុណភាពផ្លូវជាតិលេខ៣១ ពីបែកគុស ដល់កំពង់ត្រាច មានប្រវែងប្រមាណ ៥៣,៥៣គីឡូម៉ែត្រ និងផ្លូវជាតិលេខ៣៣ ពីក្រុងកំពត ដល់ច្រកលក ប្រវែង ៥២,៥៧គីឡូម៉ែត្រ ដោយមានការអញ្ជើញចូលរួមពី ឯកឧត្តម វ៉ាង វិនធៀន ឯកអគ្គរដ្ឋទូតនៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា ក្រសួង-ស្ថាប័ន អាជ្ញាធរខេត្តពាក់ព័ន្ធ ភ្ញៀវ កិត្តិយសជាតិ-អន្តរជាតិ បងប្អូនប្រជាពលរដ្ឋ លោកគ្រូ អ្នកគ្រូ ព្រមទាំងសិស្សានុសិស្សជាច្រើនរូបផងដែរ។ ថ្លែងក្នុងរបាយការណ៍គោរពជូន សម្តេចតេជោនាយករដ្ឋមន្ត្រី ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅ តាមរយៈឯកឧត្តម វ៉ាង វិនធៀន ចំពោះរដ្ឋាភិបាលនៃសាធារណរដ្ឋប្រជាមានិតចិន ដែលបានផ្តល់ឥណទានសម្បទាន ជំនួយឥតសំណង និងជំនួយបច្ចេកទេសជាបន្ដបន្ទាប់ស្របតាមសំណូមពរ និងសេចក្ដីត្រូវការចាំបាច់របស់កម្ពុជា សម្រាប់ការសាងសង់ ស្តារ និងអភិវឌ្ឍហេដ្ឋារចនាសម្ព័ន្ធដឹកជញ្ជូនសំដៅជំរុញកំណើនសេដ្ឋកិច្ចជាតិកម្ពុជាឱ្យកាន់តែមានភាពល្អប្រសើរ។ ជម្រាបជូនអង្គពិធីនាឱកាសនេះ ឯកឧត្តមទេសរដ្ឋមន្ត្រី ក៏បានលើកឡើងពីគម្រោងស្ដារ និងលើកកម្រិតផ្លូវជាតិទាំងពីរខ្សែ ដែលក្នុងនោះ ផ្លូវជាតិលេខ៣១ មានប្រវែងសរុបប្រមាណ ៥៣,៥៣គីឡូម៉ែត្រ គិតចាប់ពីថ្នល់បែកគុស (ចំណុចប្រសព្វផ្លូវជាតិលេខ៣) រហូតទៅដល់ទីរួមស្រុកកំពង់ត្រាច (ចំណុចតភ្ជាប់ផ្លូវជាតិលេខ៣៣) ក្រាលដោយបេតុងកៅស៊ូ (AC) មានកម្រាស់ ៧សង់ទីម៉ែត្រ និងពង្រីកទទឹងតួផ្លូវរហូតដល់ ១២ម៉ែត្រ។ គម្រោងនេះ នឹងរួមបញ្ចូល នូវការសាងសង់ស្ពានថ្មី ចំនួន ១កន្លែង ទទឹង ១២ម៉ែត្រ និងជួសជុលស្ពានដែលមានស្រាប់ចំនួន ២កន្លែង ប្រវែងសរុប ៤០ម៉ែត្រ និងដាក់លូគ្រប់ប្រភេទចំនួន ១៤៤កន្លែង ផងដែរ។ ចំណែកឯ ផ្លូវជាតិលេខ៣៣ មានប្រវែងសរុបប្រមាណ ៥២,៥៧គីឡូម៉ែត្រ ចាប់ពីក្រុងកំពត បន្តរហូតដល់ច្រកលក (ព្រំដែនកម្ពុជា-វៀតណាម) រួមទាំងផ្លូវតភ្ជាប់ ក្នុងក្រុងកំពត (ផ្លូវក្រុងលេខ ៧០៩) នឹងត្រូវស្ដារ និងលើកកម្រិតគុណភាពជាប្រភេទផ្លូវ ក្រាលបេតុងកៅស៊ូ (AC) មានកម្រាស់ ៥សង់ទីម៉ែត្រ និងកម្រាស់ ៧សង់ទីម៉ែត្រ ព្រមទាំងពង្រីកទទឹងតួផ្លូវរហូតដល់ ១២ម៉ែត្រ។ គម្រោងនេះ នឹងរួមបញ្ចូលនូវការសាងសង់ស្ពានថ្មី ចំនួន ១កន្លែង ប្រវែង ៩០ម៉ែត្រ ទទឹង ១២ម៉ែត្រ ស្របជាមួយនឹងស្ពានចាស់និងជួសជុលកែលម្អស្ពានដែលមានស្រាប់ចំនួន ២កន្លែង ប្រវែងសរុប ៦៥ម៉ែត្រ ព្រមទាំងដាក់លូគ្រប់ប្រភេទចំនួន ១៣៤កន្លែង។ ឯកឧត្តមទេសរដ្ឋមន្ត្រី បានគូសបញ្ជាក់ថា៖ ផ្លូវជាតិលេខ៣១ និងផ្លូវជាតិលេខ៣៣ គឺជាខ្សែផ្លូវតភ្ជាប់គ្នាដ៏មានសក្តានុពល ស្ថិតនៅក្នុងតំបន់ប៉ូលសេដ្ឋកិច្ចនៃខេត្តភាគនិរតី ដែលក្នុងនោះ ផ្លូវជាតិលេខ៣១ ឆ្លងកាត់ភូមិសាស្រ្តខេត្តតាកែវ និងខេត្តកំពត និងផ្លូវជាតិលេខ៣៣ ឆ្លងកាត់ខេត្តកំពត និងខេត្តកែប និងព្រមទាំងតភ្ជាប់រហូតទៅដល់ច្រកលក (ព្រំដែនកម្ពុជា-វៀតណាម) ផងដែរ។ ឯកឧត្តមទេសរដ្ឋមន្ត្រី បានបន្ថែមថា ក្រោយបញ្ចប់ការសាងសង់ ផ្លូវជាតិទាំងពីរខ្សែនេះ នឹងផ្តល់អត្ថប្រយោជន៍ ដល់សេដ្ឋកិច្ចជាតិ និងសេដ្ឋកិច្ចគ្រួសារ តាមរយៈការសម្រួលដល់ការធ្វើដំណើររបស់បងប្អូនប្រជាពលរដ្ឋ និងការដឹកជញ្ជូនគ្រប់ប្រភេទ ដែលនឹងប្រែក្លាយតំបន់ឆ្នេរឱ្យក្លាយទៅជាតំបន់ដែលមានហេដ្ឋារចនាសម្ព័ន្ធផ្លូវថ្នល់ល្អប្រសើរនិងប្រទាក់ក្រឡាគ្នា ដើម្បីរួមចំណែកនៅក្នុងការជំរុញការផ្លាស់ប្តូរពាណិជ្ជកម្ម ការវិនិយោគ និងទាក់ទាញភ្ញៀវទេសចរបន្ថែមទៀត។ ឆ្លៀតក្នុងឱកាសនោះ ឯកឧត្តមទេសរដ្ឋមន្ត្រី បានរំលេចឱ្យឃើញពីទិសដៅការងារបន្តក្នុងការអភិវឌ្ឍ ហេដ្ឋារចនាសម្ព័ន្ធផ្លូវ-ស្ពានសំខាន់ៗ ដែលបាន និងកំពុងសិក្សា និងគម្រោងសំខាន់ៗមួយចំនួនត្រៀមបើកការដ្ឋានសាងសង់ ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្ដេចតេជោនាយករដ្ឋមន្ត្រី ដែលបានលះបង់ទាំងកម្លាំងកាយ និងកម្លាំងចិត្ត ព្រមទាំងប្រាជ្ញាស្មារតីក្នុងបុព្វហេតុជាតិមាតុភូមិ និងប្រជាជន នាំមកនូវសុខសន្តិភាព និងការអភិវឌ្ឍរីកចម្រើនឥតឈប់ឈរ។ ទន្ទឹមជាមួយគ្នានោះ សម្តេចតេជោនាយករដ្ឋមន្ត្រី បានផ្តល់កិត្តិយសដ៏ខ្ពង់ខ្ពស់អញ្ជើញឡើងថ្លែងសុន្ទរកថា និងសំណេះសំណាលទៅកាន់អង្គពិធីទាំងមូលប្រកបដោយសេចក្តីសោមនស្សរីករាយ។ សម្តេចតេជោនាយករដ្ឋមន្ត្រី បានសង្កត់ធ្ងន់ជាពិសេសលើការអភិវឌ្ឍវិស័យហេដ្ឋារចនាសម្ព័ន្ធនៅកម្ពុជា ដែលនៅតែជាអាទិភាព និងជាតម្រូវការចាំបាច់។ សម្តេចតេជោ បានគូសបញ្ជាក់ម្ដងហើយម្ដងទៀតថា៖ វិស័យហេដ្ឋារចនាសម្ព័ន្ធផ្លូវថ្នល់-ស្ពាននៅកម្ពុជា គឺជាវិស័យអាទិភាពមួយក្នុងចំណោមវិស័យអាទិភាពទាំង ៤ រួមមាន៖ មនុស្ស ផ្លូវ ភ្លើង និងទឹក ដែលបានកំណត់នៅក្នុងយុទ្ធសាស្តចតុកោណ ហើយត្រូវបានរាជរដ្ឋាភិបាលបន្តផ្ដោតការយកចិត្តទុកដាក់ តាមរយៈកិច្ចខិតខំប្រឹងប្រែងកៀរគរប្រភពថវិកាក្រោមហិរញ្ញប្បទានសម្បទា និងជំនួយឥតសំណងពីបណ្ដាប្រទេសជាមិត្តនិងដៃគូអភិវឌ្ឍន៍នានា ក្នុងនោះមិត្តចិន គឺជាប្រទេសលំដាប់ទី១ ដែលបានផ្ដល់ប្រាក់កម្ចីសម្បទាន និងជំនួយជាច្រើន សម្រាប់គាំទ្រដល់ការអភិវឌ្ឍ និងការកសាងហេដ្ឋារចនាសម្ព័ន្ធផ្លូវថ្នល់នៅកម្ពុជា។ សម្តេចតេជោ បានបន្តទៀតថា៖ កម្ពុជាមានការអភិវឌ្ឍលើគ្រប់វិស័យពីមួយថ្ងៃទៅមួយថ្ងៃដូចសព្វថ្ងៃ ក៏ដោយសារតែកម្ពុជាមានសុខសន្តិភាពពេញលេញ។ ក្រោមដំបូលសុខសន្តិភាព និងស្ថិរភាពនយោបាយ ដែលយើងបានខិតខំបញ្ចប់សង្គ្រាម រហូតទទួលបានការឯកភាពជាតិពាសពេញផ្ទៃប្រទេស ហើយកាលពីម្សិលមិញ យើងក៏បានអបអរសាទរខួបលើកទី២៤ (២៩ ធ្នូ ១៩៩៨ – ២៩ ធ្នូ ២០២២) នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនយោបាយឈ្នះ ឈ្នះផងដែរ។ សម្តេចតេជោ នាយករដ្ឋមន្ត្រី ក៏បានយកឱកាសនេះគូសបញ្ជាក់សារជាថ្មីផងដែរ អំពីសាវតារនៃការដាក់ចេញនូវនយោបាយឈ្នះ ឈ្នះនេះ ហើយអត្ថន័យ និងផលប្រយោជន៍ពិតប្រាកដនៃនយោបាយឈ្នះ ឈ្នះ គឺត្រូវបានកំណត់ថាសង្គ្រាម និងជម្លោះប្រដាប់អាវុធត្រូវបានបញ្ចប់ទាំងស្រុង ការស្លាប់ ឬរបួស ឬការព្រាត់ប្រាសដោយសារសង្គ្រាម គឺមិនមានទៀតទក្នុងរយៈពេល ២០ឆ្នាំចុងក្រោយនេះ ជាពិសេសដំណើរការបញ្ចប់សង្គ្រាមតាមរយៈនយោបាយឈ្នះ ឈ្នះនេះ គឺយើងមិនបានប្រើប្រាស់គ្រាប់កាំភ្លើងសូម្បីមួយគ្រាប់ដើម្បីដោះស្រាយនោះទេ។ ឆ្លៀតក្នុងឱកាសនោះដែរ សម្តេចតេជោ បានលើកឡើងអំពីកំណែទម្រង់ស៊ីជម្រៅ ក្នុងវិស័យទំនើបកម្មប្រព័ន្ធស្វ័យប្រវត្តិកម្មបច្ចេកវិទ្យាឌីជីថល ដែលធ្វើឱ្យចំណេញពេលវេលាបានច្រើន។ សម្តេច បានថ្លែងកោតសរសើរ ដល់ក្រសួងសាធារណការ និងដឹកជញ្ជូន ដែលបាននឹងកំពុងប្រឹងប្រែងក្នុងការធ្វើទំនើបកម្ម ប្រព័ន្ធស្វ័យប្រវត្តិកម្ម បច្ចេកវិទ្យាឌីជីថល ជាពិសេសលើការផ្តល់សេវាសាធារណៈ របស់ខ្លូន រួមមានដូចជា៖ ការទិញលេខសម្គាល់យានយន្ត និងការចុះបញ្ជីយានយន្ត ជាដើម។ ជាទីបញ្ចប់ ជាមួយនឹងការប្រកាសបើកការដ្ឋានគម្រោងស្តារ និងលើកកម្រិតគុណភាពផ្លូវជាតិលេខ៣១ និងផ្លូវជាតិលេខ៣៣ ចាប់ពីពេលនេះតទៅ សម្តេចតេជាបានប្រសិទ្ធពរជ័យ ជាពិសេសនៅក្នុងឱកាសឆ្នាំថ្មីឆ្នាំសកល២០២៣ ជូនចំពោះសម្តេច ឯកឧត្តម លោកជំទាវ លោក លោកសី ភ្ញៀវកិត្តិយសជាតិ-អន្តរជាតិ មន្ត្រីរាជការ កងកម្លាំងប្រដាប់អាវុធ បងប្អូនប្រជាពលរដ្ឋទាំងអស់ និងជូនដល់ ឯកឧត្តមឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា សហការីនិងអ្នកជំនាញការចិនទាំងអស់ ដែលបាននិងកំពុងបំពេញបេសកកម្មនៅក្នុងព្រះរាជាណាចកកម្ពុជា សូមមានសុខភាពល្អ សុខសុវត្ថិភាពក្នុងការធ្វើដំណើរ និងសូមប្រកបដោយពុទ្ធពរ និងពរទាំង ៥ប្រការ គឺ អាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាតឡើយ។ សូមជម្រាបថា៖ ផ្លូវជាតិទាំងពីរខ្សែនេះ នឹងត្រូវអនុវត្ដការសាងសង់ដោយក្រុមហ៊ុនសាជីវកម្មស្ពាន និងថ្នល់ចិន(CRBC) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន ប្រើរយៈពេលសាងសង់ចំនួន ៤០ខែ ដែលនឹងបញ្ចប់ការសាងសង់នៅក្នុងឆ្នាំ២០២៦ ហើយគ្រោងចំណាយថវិកា រួមមាន៖ ផ្លូវជាតិលេខ៣១ ប្រមាណជាង ៦០លានដុល្លារអាមេរិក និងផ្លូវជាតិលេខ៣៣ ប្រមាណជាង ៦១លានដុល្លារអាមេរិក ដែលជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាករផ្សេងៗ៕