ភ្នំពេញ៖ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានជំរុញឱ្យមានការប្រើប្រាស់យានយន្តអគ្គិសនីឱ្យបានច្រើន ​ដើម្បីកាត់បន្ថយការបំពុលបរិស្ថាន និងចំណេញថវិកាច្រើនជាងការប្រើយានយន្តដែលប្រើប្រេងឥន្ធនៈ។ នាឱកាសអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ស្ថានីយបញ្ចូលថាមពលយានយន្តអគ្គិសនី និងពិធីប្រគល់-ទទួលយានយន្តអគ្គិសនី នៅទីស្ដីការក្រសួងសាធារណការ និងដឹកជញ្ជូន កាលពីព្រឹកថ្ងៃទី២៩ ខែវិច្ឆិកា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និងដឹកជញ្ជូន បានជំរុញឱ្យអ្នកប្រើប្រាស់យានយន្តនៅកម្ពុជា ងាកមកប្រើប្រាស់​យានយន្តអគ្គិសនីវិញ ​ដោយឯកឧត្តម បានលើកឡើងពីផលចំណេញជាថវិកាផង និងជួយដល់ផ្នែកបរិស្ថានផង។ ឯកឧត្តមទេសរដ្ឋមន្ត្រី ស៊ុន ចាន់ថុល បានមានប្រសាសន៍ថា រាជរដ្ឋាភិបាលកម្ពុជាបានប្ដេជ្ញា​ចិត្ត​ហើយ នៅឆ្នាំ២០៥០ គឺ​មិនឱ្យមានការបំពុលបរិស្ថាន ​ដើម្បីជាការចូលរួមការពារបរិស្ថាន ដែលធ្វើឱ្យការ​រស់នៅរបស់យើងមានសុខភាពល្អ។​ ហើយនេះជាជំហ៊ានមួយ ក្នុងចំណោមការងារ​មួយ​ចំនួនដែលយើងត្រូវតែធ្វើ គឺត្រូវកាត់បន្ថយការបំពុលបរិស្ថានដោយយានយន្តប្រើ​ប្រាស់​ប្រេងឥន្ធនៈ ដោយប្ដូរមកប្រើយានយន្តអគ្គិសនីវិញ។ សូមជម្រាបថា បច្ចុប្បន្ននេះមានក្រុមហ៊ុនចំនួន៩ បាននាំចូលរថយន្តអគ្គិសនី និងក្រុមហ៊ុនមួយចំនួន​ទៀតបាននាំចូលម៉ូតូអគ្គិសនី។ ចំពោះទីផ្សារយានយន្តអគ្គិសនីនៅកម្ពុជា រថយន្តអគ្គិសនី ដែលមាន​ដាក់លក់ក្នុងទីផ្សារ មានតម្លៃចាប់ពីជាង ១ម៉ឺនដុល្លាអាមេរិកឡើងទៅ ​រីឯទោចក្រយានយន្តអគ្គិសនី ដែលមានដាក់លក់នៅក្នុងទីផ្សាកម្ពុជា ​មានតម្លៃចាប់ពី ៧០០ដុល្លាអាមេរិកឡើងទៅ។ ចំពោះចំនួនយានយន្តអគ្គិសនីដែលកំពុងប្រើប្រាស់​នៅកម្ពុជា បើតាមរបាយការណ៍របស់​ក្រសួងសាធារណការ ​ក្នុងរយៈពេល១០ខែ​ ឆ្នាំ២០២២នេះ​ មានយានយន្តអគ្គិសនីចំនួន ៥៥៦គ្រឿង ដែលបានចុះបញ្ជី ​បើប្រៀបធៀប១០ខែនៅឆ្នាំ២០២១ ​មានយានយន្តអគ្គិសនីចុះបញ្ជីតែ ៤៥គ្រឿងប៉ុណ្ណោះ ដូច្នេះគឺកើនឡើង១១ដង៕