កិច្ចប្រជុំពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រង ការសាងសង់ និងការប្រើប្រាស់រួមនៃ ហេដ្ឋារចនាសម្ព័ន្ធទូរគមនាគមន៍ រវាងក្រសួងសាធារណការ និងដឹកជញ្ជូន និងក្រសួងប្រៃសណីយ៍ និងទូរគមនាគមន៍ តាមប្រព័ន្ធវីដេអូពីចម្ងាយ ទីស្តីការក្រសួង៖ ថ្ងៃព្រហស្បតិ៍ ៣ រោច ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៣ ខែតុលា ឆ្នាំ២០២២ ក្រុមការងារក្រសួងសាធារណការ និងដឹកជញ្ជូន ដឹកនាំដោយ ឯកឧត្ដម វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូន និងក្រុមការងារក្រសួងប្រៃសណីយ និងទូរគមនាគមន៍ដឹកនាំដោយឯកឧត្តម ខូវ មករា អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ បានជួបប្រជុំគ្នា ពិនិត្យពិភាក្សា និងផ្លាស់ប្តូរយោបល់លើសេចក្តីព្រាងអនុក្រឹត្យស្តីពីការ គ្រប់គ្រង ការសាងសង់ និងការប្រើប្រាស់រួមនៃហេដ្ឋារចនាសម្ព័ន្ធទូរគមនាគមន៍ ដើម្បីឱ្យសេចក្ដីព្រាងច្បាប់នេះមានលក្ខណៈគ្រប់ជ្រុងជ្រោយ មានសង្គតភាព បម្រើឧត្ដមប្រយោជន៍ជាតិជារួម ដោយមានការអញ្ជើញ ចូលរួមពីថ្នាក់ដឹកនាំក្រសួង និងអង្គភាពពាក់ព័ន្ធនៃស្ថាប័នទាំងពីរតាមរយៈប្រព័ន្ធវីដេអូពីចម្ងាយ។ អង្គប្រជុំបានពិនិត្យពិភាក្សាលម្អិត និងកែសម្រួលមាត្រាមួយចំនួន នៃសេចក្តីព្រាងអនុក្រឹត្យស្តីពីការគ្រប់គ្រង ការសាងសង់ និងការប្រើប្រាស់រួមនៃហេដ្ឋារចនាសម្ព័ន្ធទូរគមនាគមន៍ ដែលមានការពាក់ព័ន្ធការងារវិស័យសាធារណការ និងដឹកជញ្ជូន ជាពិសេសពាក់ព័ន្ធការគ្រប់គ្រង ប្រើប្រាស់ដីចំណីផ្លូវថ្នល់ ផ្លូវរថភ្លើងរួមមាន៖ មាត្រា៤ និងមាត្រា៥ នៃជំពូកទី២ (ស្ថាប័នមានសមត្ថកិច្ច) និងមាត្រា៨ នៃផ្នែកទី១ (វិធានទូទៅ) ជំពូកទី៤ (ការសាងសង់ ការកែប្រែ និងការរុះរើហេដ្ឋារចនាសម្ព័ន្ធទូរគមនាគមន៍)។ ដោយឡែក ដោយមានការពាក់ព័ន្ធការងារគ្រប់គ្រងដីចំណីផ្លូវថ្នល់ និងផ្លូវដែក តាមសំណើរបស់ក្រុមការងារក្រសួងសាធារណការ និងដឹកជញ្ជូន ក្រុមការងាររបស់ក្រសួងប្រៃសណីយនិងទូរគមនាគមន៍ ក៏បានសន្យាធ្វើការងារជាមួយក្រុមប្រឹក្សាអ្នកច្បាប់បន្ថែម ដើម្បីដាក់បញ្ចូលច្បាប់លិខិតបទដ្ឋានគតិយុត្តិពាក់ព័ន្ធមួយចំនួនទៅក្នុងមូលបទ នៃសេចក្តីព្រាងអនុក្រឹត។ ជាសំណូមពររបស់ក្រុមការងារក្រសួងសាធារណការ និងដឹកជញ្ជូន នៅមានចំនុចពាក់ព័ន្ធមួយចំនួនទៀត ត្រូវស្នើសុំការសម្រេច និងឯកភាពពីប្រធានស្ថាប័នទាំងពីរក្រសួងផងដែរ៕