(ខេត្តប៉ៃលិន) ៖ ផ្លូវមួយខ្សែស្ថិតក្នុងភូមិអណ្ដូងពីរ ឃុំស្ទឹងកាច់ ស្រុកសាលាក្រៅ ខេត្តប៉ៃលិន កំពុងរងការខូចខាតក្លាយទៅជាជង្ហុកតូច-ធំ ដោយសារទឹកជំនន់បង្កឱ្យមានការលំបាកក្នុងការធ្វើដំណើររបស់ប្រជាពលរដ្ឋ ។ប្រជាពលរដ្ឋដែលរស់នៅក្នុងមូលដ្ឋានខាងលើ បានបញ្ចាក់ឱ្យដឹងថា បន្ទាប់ពីភ្លៀងធ្លាក់ជារៀងរាល់ថ្ងៃ បានបង្កទៅជាជំនន់ទឹកភ្លៀងហើយហូរក្រួសនៅផ្នែកខាងលើទៅអស់នៅសល់តែដីបាតក្រោម លុះដក់ទឹកយូរៗទៅក៏ក្លាយជាបែកភក់តែម្ដង។ ប្រជាពលរដ្ឋបានបន្ថែមថា សម្រាប់រថយន្តតូចៗហើយទាប មានការលំបាកធ្វើដំណើរតាមផ្លូវមួយនេះ គឺបានតែរថយន្តខ្ពស់ៗប៉ុណ្ណោះ ដោយឡែកអ្នកបើកបរម៉ូតូឆ្លងកាត់ផ្លូវនេះមានសភាពរអិលពិបាកធ្វើដំណើផងដែរ។ ពាក់ព័ន្ធបញ្ហាខូចផ្លូវនេះ លោក ហ៊ត រិទ្ធី ប្រធានមន្ទីរអភិវឌ្ឍន៍ជនបទខេត្តប៉ៃលិន បានឱ្យដឹងនៅព្រឹកថ្ងៃទី១២ ខែ តុលា ឆ្នាំ ២០​២២ថា ផ្លូវនេះគឺស្ថិតនៅក្នុងគម្រោងជួសជុល និងស្ថាបនាចាក់កៅស៊ូ នៅចុងឆ្នាំ២០២២នេះ ដោយមន្រ្តីជំនាញកំពុងសិក្សា ព្រមទាំងទទួលបានថវិកាពីគម្រោងរបស់ធនាគារប្រទេសចិន AIIB ។ ចំពោះមូលហេតុដែលផ្លូវនេះទៅជាបែបនេះ ប្រធានមន្ទីរូបនេះពន្យល់ថា គឺដោយសារមន្ទីរមិនបានថែទាំរយៈពេល២ឆ្នាំមកហើយ ព្រោះផ្លូវនេះមានផ្លូវផ្សេងទៀតដែលអាចធ្វើដំណើវាងបាន។ ទោះបីជាយ៉ាងណា អាជ្ញាធរខេត្ត នឹងធ្វើការជួសជុលផ្លូវនេះឡើងវិញ សម្រាប់ឱ្យពលរដ្ឋងាយស្រួលក្នុងការធ្វើដំណើរ របស់ប្រជាពលរដ្ឋក្នុងមូលដ្ឋាន ៕