ក្រសួងសាធារណការ និងដឹកជញ្ជូន រៀបចំសិក្ខាសាលាប្រមូលធាតុចូល ដើម្បីធ្វើឱ្យប្រសើរឡើងដល់ផែនទីបង្ហាញផ្លូវស្ថានីយបញ្ចូលថាមពលយានយន្តអគ្គិសនី ដែលជាផ្នែកមួយសំខាន់ក្នុងការលើកកម្ពស់ការប្រើប្រាស់យានយន្តអគ្គិសនីនៅកម្ពុជាឱ្យកាន់តែទូលំទូលាយ ថ្ងៃសុក្រ ១០កើត ខែអាសាឍ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០៨ ខែកក្កដា ឆ្នាំ២០២២ នៅទីស្តីការក្រសួង ឯកឧត្តម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក ក្រសួង សាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបើកសិក្ខាសាលាផ្ទៃក្នុងរបស់ក្រសួងសាធារណការ និងដឹកជញ្ជូន ស្តីពីការប្រមូលធាតុចូលនៃផែនទីចង្អុលផ្លូវសម្រាប់រៀបចំស្ថានីយសាកយានយន្តអគ្គិសនីនៅកម្ពុជា ដោយមានការអញ្ជើញចូលរួមពីថ្នាក់ដឹកនាំក្រសួង តំណាងអង្គការ UNDP និងសិក្ខាកាមដែលជាតំណាងមកអគ្គនាយកទាំងអស់ តំណាងមកពីនាយកដ្ឋានពត៌មានវិទ្យា និងទំនាក់ទំនងសាធារណៈ និងតំណាងមកពីវិទ្យាស្ថានតេជោសែនសាធារណការ និងដឹកជញ្ជូន ប្រមាណ៥០នាក់ផងដែរ។ សិក្ខាសាលានេះរៀបចំឡើងដោយក្រសួងសាធារណការ និងដឹកជញ្ជូន រួមសហការដោយអង្គការUNDP ក្នុងគោលបំណងដើម្បីប្រមូលធាតុចូលសំដៅធ្វើឱ្យប្រសើរឡើងដល់ផែនទីបង្ហាញផ្លូវរៀបចំស្ថានីយបញ្ចូលថាមពលយានយន្តអគ្គិសនី ដែលជាផ្នែកមួយសំខាន់ក្នុងការលើកកម្ពស់ការប្រើប្រាស់យានយន្តអគ្គិសនីនៅកម្ពុជាឱ្យកាន់តែទូលំទូលាយ។ ថ្លែងក្នុងសុន្ទរកថាបើកនាឱកាសនោះ ឯកឧត្តមអគ្គនាយក បានជំរុញលើកទឹកចិត្តឱ្យសិក្ខាកាម ទាំងអស់ផ្តល់មតិយោបល់ ក៏ដូចជាធាតុចូលឱ្យបានផុសផុល ដើម្បីឱ្យផែនទីចង្អុលផ្លូវរបស់យើងកាន់តែមានភាពប្រសើរឡើង និងកាន់តែមានសារៈសំខាន់សម្រាប់ការប្រើប្រាស់នៅថ្ងៃអនាគត តាមគំនិត ផ្តួចផ្តើមដ៏ខ្ពង់ខ្ពស់ និងចក្ខុវិស័យវែងឆ្ងាយរបស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន។ ឯកឧត្តមអគ្គនាយក បានជំរុញលើកទឹកចិត្តឱ្យសិក្ខាកាមទាំងអស់ចូលរួមផ្តល់មតិយោបល់ ក៏ដូចជាធាតុ ចូលឱ្យបានផុសផុលដើម្បីឱ្យការសិក្សាផែនទីបង្ហាញផ្លូវស្ថានីយបញ្ចូលថាមពលយានយន្តអគ្គិសនីមានភាពស៊ីជម្រៅ និងផ្អែកតាមបទពិសោធន៍ដែលបានជួបប្រទះ ដើម្បីទទួលបានលទ្ធផលល្អក្នុងការជំរុញឱ្យផែនទីបង្ហាញផ្លូវនេះមានព័ត៌មានគ្រប់ជ្រុងជ្រោយលើការកំណត់ទីតាំងស្ថានីយសាកយានយន្តអគ្គិសនី ឱ្យស្របតាមតម្រូវការក្នុងពេលបច្ចុប្បន្ន និងថ្ងៃអនាគត និងសំដៅធ្វើយ៉ាងណាឱ្យសម្រេចបានតាមគោលដៅ និងអនុសាសន៍ណែនាំដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី ដែលបានប្រគល់ភារកិច្ចនេះឱ្យក្រសួងសាធារណការ និងដឹកជញ្ជូន ជាអ្នកដឹកនាំ និងសម្របសម្រួល។ ឆ្លៀតក្នុងឱកាសនោះដែរ ឯកឧត្តមអគ្គនាយក បានថ្លែងអំណរគុណយ៉ាងជ្រាលជ្រៅដល់អង្គការUNDP ដែលបានជួយគាំទ្រលើការសិក្សាផែនទីបង្ហាញផ្លូវស្ថានីយបញ្ចូលថាមពលយានយន្តអគ្គិសនីនេះ និងបានថ្លែងអំណរគុណផងដែរចំពោះសិក្ខាកាមទាំងអស់ដែលបានចំណាយពេលវេលាដ៏មានតម្លៃចូលរួម និងផ្តល់យោបល់ទៅលើផែនទីបង្ហាញផ្លូវស្ថានីយបញ្ចូលថាមពលយានយន្តអគ្គិសនីនៅក្នុងសិក្ខាសាលានាថ្ងៃនេះ។ សូមជម្រាបជូនថា៖ បច្ចុប្បន្ននេះក្រសួងសាធារណការ និងដឹកជញ្ជូន មានឧបករណ៍បញ្ចូលថាមពល យានយន្តអគ្គិសនីសរុបចំនួន០៥គ្រឿង ក្នុងនោះ០៤គ្រឿង ជាជំនួយរបស់អង្គការUNDP និង០១គ្រឿង ទៀតជារបស់ក្រុមហ៊ុនប្រេងឥន្ធនៈឈេហ្វរ៉ុន(Chevron) ហើយតាមផែនការ ក្រុមហ៊ុននឹងតម្លើងឧបករណ៍នេះឱ្យបាន៣០០គ្រឿង ក្នុងរយៈពេល០៣ឆ្នាំបន្ទាប់។ បន្ថែមពីលើនេះ ដៃគូឯកជន (China Chamber of Commerce) ក៏បានសន្យាគាំទ្រការប្រើប្រាស់យានយន្តអគ្គិសនីនៅកម្ពុជា ដោយជាជំហានដំបូងផ្តល់ស្ថានីយបញ្ចូលថាមពលយានយន្តអគ្គិសនីចំនួន១០ គ្រឿង។ ក្រៅពីនេះ ក្រសួងក៏បានជួបជាមួយតំណាងក្រុមហ៊ុនប្រេងឥន្ធនៈធំៗចំនួន០៥ផងដែររួមមាន៖ ក្រុមហ៊ុនសូគីមិច ក្រុមហ៊ុនតូតាល់ ក្រុមហ៊ុនកម្ពុជាតេលា ក្រុមហ៊ុនកាល់តិច និងក្រុមហ៊ុនភីធីធី ដើម្បីពិភាក្សាស្តីពីការដំឡើងឧបករណ៍បញ្ចូលថាមពលយានយន្តអគ្គិសនី នៅតាមទីតាំងនៃបណ្តាស្ថានីយប្រេងឥន្ធនៈទាំងនេះផងដែរ៕