បន្ទាប់ពីមានគ្រោះថ្នាក់ចរាចរណ៍រវាងរថយន្តនិងរថយន្តកើតឡើងនៅលើផ្លូវល្បឿនលឿនភ្នំពេញ-ក្រុងព្រះសីហនុកាលពីពេលថ្មីៗនេះ លោកហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងថា ក្រសួងបានព្យាយាមរឹតបន្តឹងបន្ថែមចំពោះការឡើងទៅបើកបរនៅលើផ្លូវល្បឿនលឿននេះ។ ថ្លែងប្រាប់វិទ្យុវាយោ លោកហ៊ាង សុទ្ធាយុត្តិក្នុងនាមក្រសួងសាធារណការ បានស្នើឱ្យពលរដ្ឋទាំងអស់យោគយល់អធ្យាស្រ័យចំពោះការហាមមិនឱ្យឡើងបើកបរលើផ្លូវល្បឿនលឿន មុនពេលប្រកាសឱ្យប្រើប្រាស់ជាផ្លូវការ។ អ្នកនាំពាក្យរូបនេះក៏បានលើកឡើងថា ក្រសួងគ្រោងនឹងបើកឱ្យដំណើរការប្រើប្រាស់ផ្លូវល្បឿនលឿនភ្នំពេញ-ព្រះសីហនុសាកល្បងដោយឥតគិតថ្លៃនៅខែកញ្ញាខាងមុខ។ លោកថា បច្ចុប្បន្ននេះការស្ថាបនាផ្លូវល្បឿនលឿនភ្នំពេញ-ព្រះសីហនុ សម្រេចបានប្រមាណ៩៣ភាគរយហើយ។ ក្រុមការងារស្ថាបនាកំពុងខិតខំដើម្បីធ្វើយ៉ាងម៉េចឱ្យការស្ថាបនាផ្លូវនេះបានរួចរាល់មុនពេលវេលាកំណត់។ សូមជម្រាបជូនថា គម្រោងផ្លូវល្បឿនលឿនភ្នំពេញ-ព្រះសីហនុ មានប្រវែង១៨៧,០៥គីឡូម៉ែត្រ ផ្លូវនេះត្រូវសាងសង់ជា៤គន្លង តួផ្លូវមានទទឹង២៤ម៉ែត្រ ក្រាលកៅស៊ូAC។ គម្រោងផ្លូវល្បឿនលឿននេះអនុវត្តការសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) និងត្រួតពិនិត្យបច្ចេកទេសដោយក្រុមហ៊ុន MINCONSULT SDN. BHD. ប្រើរយៈពេលសាងសង់៤៨ខែ គ្រោងចំណាយថវិកាប្រមាណ២០១៩លានដុល្លារសហរដ្ឋអាមេរិក។ ផ្លូវនេះបានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ ដែលគ្រោងនឹងបញ្ចប់នៅថ្ងៃទី៣១ ខែឧសភា ឆ្នាំ២០២៣ខាងមុខនេះ៕ ដោយ៖ ម៉ៅ សុភ័ក្រ្តា