ភ្នំពេញ៖ ឯកឧត្តម គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានអះអាងថា ឱសានវាទចុងក្រោយនៃយុទ្ធនាការប្រមូលពន្ធអាករ លើរថយន្ដមានស្រាប់នៅក្នុងប្រទេស ត្រឹមថ្ងៃទី៣០ខែមិថុនា ឆ្នាំ២០២២ ហើយចាប់ពីថ្ងៃទី១ ខែកក្កដា ឆ្នាំ២០២២តទៅ អគ្គនាយកដ្ឋានគយ និងរដ្ឋាករកម្ពុជា ពុំមានសិទ្ធទទួលបង់ពន្ធរថយន្ដមានស្រាប់ក្នុងប្រទេសនោះទេ តួនាទីដ៏សំខាន់ គឺការចុះបង្ក្រាប។ អគ្គនាយកដ្ឋានគយ និងរដ្ឋាករកម្ពុជានឹងចុះបង្ក្រាបរថយន្តគ្មានពន្ធកាន់តែខ្លាំង ក្រោយផុតឱសានវាទជាង៥០ថ្ងៃទៀត , រថយន្ដចង្កូតស្ដាំ បង្ក្រាបបាននឹងកម្ទេចចោល។ នាព្រឹកថ្ងៃពុធ ទី៤ ខែឧសភា ឆ្នាំ២០២២ អគ្គនាយកដ្ឋានគយនិងរដ្ឋាករកម្ពុជា (អគរ) បានរៀបចំសន្និសីទសារព័ត៌មានដោយផ្ទាល់ និងតាមប្រព័ន្ធវីដេអូអនឡាញ ស្ដីពីវឌ្ឍនភាពនៃការអនុវត្តការប្រមូលពន្ធលើយានយន្តគ្មានពន្ធ និងអាករនាំចូល ដែលមានស្រាប់ក្នុងប្រទេស លើកទី៥ ក្រោមអធិបតីភាពរបស់ឯកឧត្ដមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា។ ឯកឧត្ដមបណ្ឌិត គុណ ញឹម បានថ្លែងថា សន្និសីទសារព័ត៌មាននេះ ត្រូវបានរៀបចំឡើងក្នុងគោលបំណងផ្សព្វផ្សាយ ដល់សាធារណជនអំពីវឌ្ឍនភាព នៃការអនុវត្តការប្រមូលពន្ធលើយានយន្តគ្មានពន្ធនិងអាករនាំចូលមានស្រាប់ ក្នុងប្រទេសស្របតាមខ្លឹមសារសេចក្ដីជូនដំណឹងលេខ ៤៨២ សជណ.ហធ ចុះថ្ងៃទី២ ខែកញ្ញា ឆ្នាំ២០២១ របស់ទីស្ដីការគណៈរដ្ឋមន្ត្រី ជាពិសេសដើម្បីក្រើនរំលឹកដល់ម្ចាស់រថយន្តគ្មានពន្ធមានស្រាប់ ក្នុងប្រទេស ដែលនៅពុំទាន់ចូលមកបង់ពន្ធនិងអាករ ឱ្យរួសរាន់ចូលមកបំពេញកាតព្វកិច្ចពន្ធនិងអាករទាំងអស់គ្នា ឱ្យបានមុនឱសានវាទកំណត់។ គិតចាប់ពីថ្ងៃបើកយុទ្ធនាការនាដើមខែកញ្ញា ឆ្នាំ២០២១ ដល់ថ្ងៃទី៣០ ខែមេសា ឆ្នាំ២០២២ នេះ មានរថយន្តចំនួន 6,922 គ្រឿង (ចង្កូតឆ្វេងចំនួន 2,332 គ្រឿង, ចង្កូតស្ដាំបានកែចង្កូតទៅឆ្វេងរួចចំនួន 2,358 គ្រឿង និងរថយន្តចង្កូតស្ដាំនៅសល់រង់ចាំកែចង្កូតទៅឆ្វេងចំនួន 2,232 គ្រឿង) ត្រូវបានម្ចាស់នាំយកមកបំពេញកាតព្វកិច្ចពន្ធនិងអាកររួចហើយ។ បើគិតជាប្រាក់ពន្ធនិងអាករ (រួមទាំងប្រាក់កក់) ដែលប្រមូលបានមានចំនួនសរុបប្រមាណ ៥៩.៣៧ លានដុល្លារអាមេរិក។ បន្ទាប់ពីឆ្លើយតបទៅនឹងសំណួរនានា របស់អ្នកសារព័ត៌មានមួយចំនួន ពាក់ព័ន្ធនឹងលទ្ធផល វឌ្ឍនភាព និងបញ្ហាប្រឈមនានា ព្រមទាំងការងារមួយចំនួនទៀត ក្នុងយុទ្ធនាការនៃការប្រមូលពន្ធលើរថយន្តគ្មានពន្ធមានស្រាប់ក្នុងប្រទស ឯកឧត្ដមរដ្ឋមន្ត្រីប្រតិភូ បានអំពាវនាវដល់សាធារណជន ជាពិសេសម្ចាស់និងអ្នកកាន់កាប់រថយន្តគ្មានពន្ធមានស្រាប់ក្នុងប្រទេស ដែលពុំទាន់ចូលមកបង់ពន្ធអាករ ឱ្យរួសរាន់ចូលមកបំពេញកាតព្វកិច្ចពន្ធអាករនាំចូលឱ្យបានមុនថ្ងៃទី៣០ ខែមិថុនា ឆ្នាំ២០២២។ ក្រោយថ្ងៃឱសានវាទនេះ អគ្គនាយកដ្ឋានគយនិងរដ្ឋាករកម្ពុជា នឹងអនុវត្តវិធានការបង្ក្រាបរថយន្តគ្មានពន្ធនិងអាការយ៉ាងតឹងរឹង និងសកម្មនៅទូទាំងប្រទេស ដោយគ្មានការពន្យារពេលឡើយ។ បន្ទាប់ពីបង្ក្រាបបាន រថយន្តចង្កូតឆ្វេងតម្រូវឱ្យបង់ពន្ធនិងអាករ និងពិន័យផ្សេងៗ តាមបទប្បញ្ញត្តិជាធរមាន ដោយគ្មានការអនុគ្រោះ ហើយរថយន្តចង្កូតស្តាំជាកម្មវត្ថុនៃការដោះបំបែកជាគ្រឿងបន្លាស់ ឬកម្ទេចចោល ស្របតាមខ្លឹមសារសេចក្តីជូនដំណឹងលេខ ៤៨២ សជណ.ហធ ដូចបានជម្រាបជូនខាងលើ ជាធរមាន។ ឯកឧត្ដម គុណ ញឹម បានបញ្ជាក់យ៉ាងដូច្នេះថា «ករណីដែលរថយន្ដគ្មានពន្ធ បង្ក្រាបបានក្រោយថ្ងៃទី៣០ ខែមិថុនា ឆ្នាំ២០២២ គឺរថយន្ដចង្កួតឆ្វេង ត្រូវទទួលរងនូវការបង់ពន្ធអាករ តាមច្បាប់ជាធរមាន និងបង់ពិន័យ ដោយឡែករថយន្ដចង្កូតស្ដាំ នឹងត្រូវដោះបំណែក ទៅជាគ្រឿងបំណែករថយន្ដ និងមួយទៀត គឺអាចកម្ទេចចោលតែម្ដង»។ ឯកឧត្ដម គុណ ញឹម បានឲ្យដឹងថា ចាប់ពីថ្ងៃទី០១ ខែកក្កដា ឆ្នាំ២០២២ តទៅ គឺអគ្គនាយកដ្ឋានគយ និងរដ្ឋាករកម្ពុជា ពុំមានសិទ្ធិទទួលបង់ពន្ធរថយន្ដមានស្រាប់ក្នុងប្រទេស នោះទេ តួនាទីដ៏សំខាន់ គឺការចុះបង្ក្រាប ដោយមិនត្រឹមតែរថយន្ដទេ គឺយាន្ដយន្ដ និងទំនិញគ្មានពន្ធដទៃទៀត មាននៅក្នុងប្រទេស ដែលលួចនាំចូល។ ឯកឧត្ដម គុណ ញឹម បានបន្ថែមថា ករណីដែលរថយន្ដគ្មានពន្ធបង្ក្រាបបាន ក្រោយថ្ងៃទី៣០ ខែមិថុនា ឆ្នាំ២០២២ គឺរថយន្ដចង្កួតឆ្វេង ត្រូវទទួលរងនូវការបង់ពន្ធអាករ តាមច្បាប់ជាធរមានផង និងបង់ពិន័យថែមទៀត។ ដោយឡែករថយន្ដចង្កួតស្ដាំ នៅពេលដែលបង្ក្រាបបាន នឹងត្រូវដោះបំណែក ដោយបម្លែងរថយន្ដទៅជាគ្រឿងបំណែករថយន្ដ ពីព្រោះរថយន្ដចង្កួតស្ដាំ គឺជារថយន្ដហាមឃាត់ ក្នុងការនាំចូលសម្រាប់ប្រើប្រាស់ នៅក្នុងប្រទេស និងមួយទៀត គឺអាចកម្ទេចចោលតែម្ដង។ ឯកឧត្ដម គុណ ញឹម ក៏បានអំពាវនាវដល់ម្ចាស់រថយន្ដទាំងឡាយ ដែលនៅមិនទាន់នាំយករថយន្ដរបស់ខ្លួន ចូលមកបង់ពន្ធអាករ សូមរួសរាស់មកបំពេញ កាតព្វកិច្ចពន្ធអាករ ឲ្យបានត្រឹមថ្ងៃទី៣០ ខែមិថុនា ឆ្នាំ២០២២ ដែលនៅសល់ពេលមិនដល់៦០ថ្ងៃនោះទេ។ សូមជម្រាបថា ចាប់ពីខែកញ្ញា ដល់ថ្ងៃទី៣១ ខែធ្នូ ឆ្នាំ២០២១ រាជរដ្ឋាភិបាលកម្ពុជា តាមរយៈអគ្គនាយកដ្ឋានគយ និងរដ្ឋាករកម្ពុជា បានអនុញ្ញាតឲ្យរថយន្តអត់ពន្ធចង្កួតឆ្វេង អាចចូលបង់ពន្ធបាន ជាមួយការអនុគ្រោះពន្ធ-អាករ ១០ភាគរយ។ ខណៈរថយន្តចង្កួតស្តាំ (កែចង្កូតរួចបង់ពន្ធ) ទទួលបានការអនុគ្រោះពន្ធ១០ភាគរយ រហូតដល់ថ្ងៃទី៣០ ខែមិថុនា ឆ្នាំ២០២២។ គិតត្រឹមថ្ងៃទី៣ ខែឧសភា ឆ្នាំ២០២២ រថយន្តគ្មានពន្ធជ្រកក្រោមផ្លាកលេខផ្សេងៗ ទាំងចង្កូតឆ្វេង និងចង្កូតស្តាំ ចំនួនជិត៧ពាន់គ្រឿង បានចូលខ្លួនប្រកាស និងបង់ពន្ធ ដែលគិតជាទឹកប្រាក់៦០លានដុល្លារ បានបង់ចូលថវិកាជាតិ៕ រក្សាសិទ្ធិដោយ ៖ សុទ្ធ លី