ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន បានសម្រេចឱ្យសម្ព័ន្ធក្រុម ហ៊ុនម៉ៅការសាងសង់របស់វៀតណាម ពង្រីកកំណាត់ផ្លូវជាតិលេខ៥ ភាគកណ្ដាល ចាប់ពីធ្លាម្អម-បាត់ដំបង និងសិរីសោភ័ណ-ប៉ោយប៉ែត ដែលជាកញ្ចប់ការងារទី៤ នៃគម្រោងធ្វើឱ្យប្រសើរឡើងវិញកំណាត់ផ្លូវអាស៊ានហាយវេលេខ១នេះ ដើម្បីធ្វើការតភ្ជាប់ប្រព័ន្ធគមនាគមន៍ និងដឹក ជញ្ជូនរបស់កម្ពុជាពីព្រំដែនប្រទេសថៃទៅកាន់ប្រទេសវៀតណាម តាមរយៈផ្លូវជាតិលេខ១ និងគម្រោងនៃផ្លូវល្បឿនលឿនភ្នំពេញ-បាវិត។ ថ្លែងក្នុងពិធីចុះហត្ថលេខាលើកិច្ចសន្យាសាងសង់គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគកណ្ដាល ជាមួយសម្ព័ន្ធក្រុម ហ៊ុនម៉ៅការសាងសង់ នៅទីស្តីការ ក្រសួងសាធារណការ និងដឹកជញ្ជូន នារសៀលថ្ងៃទី២៤ ខែមីនា ឆ្នាំ២០២២ នេះ ឯកឧត្តម ទេសរដ្ឋមន្ត្រី ស៊ុន ចាន់ថុល បានបញ្ជាក់ថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគកណ្តាល នឹងធ្វើការពង្រីកលើផ្លូវចាស់ពី២គន្លង ទៅ ៤គន្លង ព្រមទាំងស្ថាបនាផ្លូវវាងក្រុងពោធិ៍សាត់មានប្រវែងជាង ១១គីឡូម៉ែត្រ ដែលមាន៤ គន្លង, មានទទឹងផ្លូវប្រវែង ២៣ម៉ែត្រ ក្រាលកៅស៊ូAC កម្រាស់១៥សង់ទីម៉ែត្រ និងមានសួនច្បារនៅចំកណ្តាល។ ជាមួយគ្នានេះ ក៏ធ្វើការពង្រីកស្ពានចាស់ចំនួន២៧កន្លែង សាងសង់ស្ពានថ្មីចំនួន៨ កន្លែង ស្ថាបនាលូរំដោះទឹក ភ្លៀង ក្នុងនោះលូមូលចំនួន ៩០ កន្លែង និងលូប្រអប់ចំនួន៧៨កន្លែង និងស្ថាបនាស្ថានីយ៍ជញ្ជីងថ្លឹងទម្ងន់រថយន្តចំនួន៦ស្ថានីយ៍។ ឯកឧត្តម ទេសរដ្ឋមន្ត្រី បានបន្តថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៥ ភាគកណ្តាល សម្រាប់កញ្ចប់ការងារទី៤ គ្រោងនឹងប្រើរយៈពេលប្រមាណ៣២ខែ និងមានតម្លៃកិច្ចសន្យាជាង ៥២លានដុល្លាអាមេរិក។ សូមបញ្ជាក់ថា រាជរដ្ឋាភិបាលកម្ពុជា បានទទួលកម្ចីឥណ ទានសម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ JICA ដែលមានទំហំទឹកប្រាក់សរុបប្រមាណ៣១៣លានដុល្លារអាមេរិក ដើម្បីធ្វើឱ្យប្រសើរឡើងវិញកំណាត់ផ្លូវជាតិលេខ ៥ ភាគកណ្តាល ដោយសាង សង់ចាប់ពីធ្លាម្អមទៅដល់បាត់ដំបងប្រវែងជាង១១០ គីឡូម៉ែត្រ និងបូកបញ្ចូលផ្នែកចុងក្រោយ ចាប់ពីសិរីសោ ភ័ណទៅដល់ប៉ោយប៉ែតប្រវែង ជាង៣៥គីឡូម៉ែត្រ សរុបមានប្រវែងជាង១៤៦ គីឡូម៉ែត្រ៕