គម្រោងដាក់លូ ផ្លូវលេខ១៥០ ប្រវែងសរុប ៤៦៦ម៉ែត្រ ដោយប្រើប្រាស់ថវិកាសរុបចំនួនជាង ៨៣ លានរៀល (៨៣,៨៨០,០០០​) ដែលជាថវិកាវិភាជន៍របស់រាជរដ្ឋាភិបាល ផ្នែកអភិវឌ្ឍន៍ត្រូវ​បានបើក​ការដ្ឋាន​នាថ្ងៃទី១៥ ខែធ្នូ ឆ្នាំ២០២១ ក្រោមវត្តមានលោកជា ពិសី អភិបាលខណ្ឌទួលគោក នៅ ក្នុងមូលដ្ឋានសង្កាត់ផ្សារដេប៉ូទី២។ មន្ត្រីរដ្ឋបាលខណ្ឌទួលគោកបានឱ្យដឹងថា លោក ជា ពិសី អភិបាលខណ្ឌទួលគោក នៅ ថ្ងៃទី១៥ ខែធ្នូ ឆ្នាំ២០២១ បានដឹកនាំ លោកអភិបាលរង លោក លោកស្រីប្រធានការិយាល័យ និងលោកស្រីចៅ សង្កាត់រងសង្កាត់ផ្សារដេប៉ូទី២ អញ្ជើញចុះបើកការដ្ឋានគម្រោងអភិវឌ្ឍន៍សង្កាត់ផ្សារដេប៉ូទី២ ដោយប្រជាពលរដ្ឋចូលរួមសរុប៥០នាក់។ ក្នុងពិធីនោះ ជាការលើកទឹកចិត្តអ្នកចូលរួម៥០នាក់ក្នុង១នាក់ៗ ទទួលបានសារុង១ ដែលជាអំណោយផ្ទាល់របស់លោកជា ពិសី និង លោកស្រីផងដែរ។ គម្រោងឆ្នាំ២០២១ កំពុងបើកការដ្ឋាននាពេលនេះ មានការ ដាក់លូ ផ្លូវលេខ១៥០ (ចាប់ពីផ្លូវលេខ២៤៥ ដល់ផ្លូវលេខ​២៣៣) ស្ថិតនៅភូមិ១ , ដាក់លូវផ្លូវលេខ១៥០ (ចាប់ពីផ្លូវលេខ២៣៣ ដល់ផ្លូវលេខ ២២៥) ស្ថិតនៅ ភូមិ១១ ដែលមានប្រវែងសរុប ៤៦៦ម៉ែត្រ ប្រើប្រាស់ថវិកាសរុបចំនួន ៨៣,៨៨០,០០០ រៀល (ប៉ែតសិបបីលាន ប្រាំបីរយប៉ែតសិបពាន់ រៀលគត់) ដែលជាថវិកាវិភាជន៍របស់រាជរដ្ឋាភិបាល ផ្នែកអភិវឌ្ឍន៍៕