ឯកឧត្តម ឈួន វ៉ន់ អគ្កនាយកនៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងារជំនាញពាក់ព័ន្ធចុះពិនិត្យមណ្ឌលផ្តល់សេវាសាធារណៈរបស់ក្រសួងសាធារណការ និងដឹកជញ្ជូន ដោយមានការចូលរួមអមដំណើរពីលោក ទេស តារារ័ត្ន ប្រធានមណ្ឌលប្រឹក្សាយោបល់សេវាសាធារណៈ នៃនាយកដ្ឋានព័ត៌មានវិទ្យា និងទំនាក់ទំនងសាធារណ: និងមន្ត្រីជំនាញពាក់ព័ន្ធមកពីអគ្គនាយកដ្ឋានដឹកជញ្ជូនផ្លូវគោកផងដែរ។ កម្មវិធីចុះពិនិត្យនេះត្រូវបានធ្វើឡើងទៅលើមណ្ឌលផ្តល់សេវាសាធារណៈមួយចំនួនរួមមាន៖ មណ្ឌលបណ្តុះបណ្តាលបើកបរយានយន្តធុនធ្ងន់ ផ្សារទំនើបអ៊ីនអន១ និងអ៊ីនអន២ ផ្សារទំនើបជីបម៉ុងណូរ៉ម៉ល មណ្ឌលត្រួតពិនិត្យលក្ខណៈបច្ចេកទេសយានជំនិះ (ឆៀក) នៅបឹងបៃតង(HK) និងប្ញស្សីកែវ(CMVIC)។ ឯកឧត្តមអគ្គនាយក បានលើកឡើងអំពីសារសំខាន់នៃការរៀបចំប្រព័ន្ធស្វ័យប្រវត្តិកម្មផ្តល់សេវាសាធារណៈផ្សេងទៀត ដើម្បីគាំទ្រដល់ការផ្ដល់សេវាសាធារណៈឱ្យស្របទៅនឹងបច្ចុប្បន្នភាពនៃបដិវត្តន៍ឧស្សាហកម្ម ជំនាន់៤.០ ឬហៅថា៖ ឌីជីថលភាវូបនីយកម្ម(Digitalization) និងគម្រោងធ្វើឱ្យប្រសើរឡើងប្រព័ន្ធត្រួតពិនិត្យលក្ខណៈបច្ចេកទេសយានជំនិះជំនាន់ថ្មី(ទីពីរ) ដែលគ្រោងនឹងដាក់ឱ្យ ដំណើរការនាពេលខាងមុខនេះ ដោយបងប្អូនប្រជាពលរដ្ឋមិនចាំបាច់បំពេញទម្រង់បែបបទដោយខ្លួនឯងទេ បងប្អូនគ្រាន់តែយកកាតគ្រីទៅកាន់ធនាគារជាដៃគូ រួចវាយបញ្ចូលព័ត៌មាន ទិន្នន័យយានជំនិះ ហើយបង់ប្រាក់និងកាន់វិកយបត្រមករោងឆៀក បងប្អូនអាចទទួលបានសេវានោះតែម្តង។ បន្ថែមពីលើនេះ ឯកឧត្តមអគ្គនាយក បានជម្រាបជូនផងដែរថា៖ កន្លងមកក្រសួងបានសាកល្បងផ្ដល់ព័ត៌មានតាមរយៈការផ្ញើសារ SMS ទៅកាន់បងប្អូនប្រជាពលរដ្ឋជាម្ចាស់យានជំនិះ ដើម្បីប្រាប់ថា៖ យានជំនិះរបស់គាត់ជិតផុតសុពលភាពហើយ សូមយកយានជំនិះមកត្រួតពិនិត្យលក្ខណៈបច្ចេកទេសឱ្យបានមុនពេលផុតកំណត់ និងបានស្នើសុំឱ្យបងប្អូនប្រជាពលរដ្ឋឈប់ប្រើសេវាក្រៅផ្លូវការ ដែលនាំឱ្យខាតបង់ ថវិកាបងប្អូន។ ឯកឧត្តមអគ្គនាយក បានថ្លែងអំណរគុណយ៉ាងជ្រាលជ្រៅដល់បងប្អូនប្រជាពលរដ្ឋ ដែលបានចូលរួម ជាមួយក្រសួងក្នុងការអនុវត្តច្បាប់ទាំងអស់គ្នា ទោះបីជាស្ថិតក្នុងវិបត្តិជំងឺកូវីដ-១៩ ធ្វើឱ្យកម្ពុជា ក៏ដូចជា ពិភពលោកទាំងមូលទទួលរងនូវផលប៉ះពាល់យ៉ាងណាក៏ដោយ ក៏ការអញ្ជើញមកទទួលសេវារបស់ ក្រសួងពីសំណាក់ប្រជាពលរដ្ឋមិនមានការថយចុះប៉ុន្មានដែរ និងបានថ្លែងអំណរគុណដល់វិស័យឯកជន ដែលបានសហការក្នុងការបើកមណ្ឌលផ្តល់សេវាសាធារណៈរបស់ក្រសួង និងជម្រាបជូនថា៖ ក្រសួងគ្រោងនឹងពង្រីកការផ្តល់សេវាសាធារណៈនេះបន្ថែមទៀតទៅតាមបណ្តារាជធានី-ខេត្ត សំដៅជំរុញធ្វើយ៉ាងណាបង្ខិតសេវាទៅកៀកនឹងប្រជាពលរដ្ឋ។