នៅថ្ងៃពុធ ៥កើត ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៤ ខែវិច្ឆិកា ឆ្នាំ២០២១ នៅសាលាខេត្តឧត្តរមានជ័យ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន គ.ស.ច.គ. ឯកឧត្តម ស៊ី ប្រាសិទ្ធ ប្រធានក្រុមប្រឹក្សាខេត្តឧត្តរមានជ័យ ឯកឧត្តម លឹម សុខតូ អភិបាលរងខេត្ត តំណាងឯកឧត្តម ប៉ែន កុសល្យ នៃអភិបាលនៃគណៈអភិបាលខេត្តឧត្តរមានជ័យ បានអញ្ជើញជាអធិបតីភាពក្នុងពិធីយុទ្ធនាការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកខេត្តឧត្តរមានជ័យ និងមានការចូលរួមអមដំណើរដោយ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងជាប្រធានផ្នែកអប់រំផ្សព្វផ្សាយ នៃអគ្គលេខាធិការដ្ឋាន គ.ស.ច.គ. លោក ឈាង ផល្លាង ប្រធានមន្ទីរសាធារណការ និងដឹកជញ្ជូនខេត្តឧត្តរមានជ័យ និងជាប្រធានលេខាធិការដ្ឋាន គ.ស.ច.គ. ខេត្តឧត្តរមានជ័យ តំណាងស្នងការដ្ឋាននគរបាលខេត្ត តំណាងបញ្ជាការដ្ឋានកងរាជអាវុធហត្ថខេត្ត បញ្ជាការដ្ឋានសឹករងខេត្តឧត្តរមានជ័យ និងមន្ត្រីអគ្កលេខាធិការដ្ឋាន គ.ស.ច.គ.។ ពិធីនេះរៀបចំឡើងដោយ នាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន សហការជាមួយអគ្គលេខាធិការដ្ឋាន នៃគណៈកម្មាធិការជាតិសុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនខេត្តឧត្តរមានជ័យ លេខាធិការដ្ឋានអនុគណៈកម្មការសុវត្ថិភាពចរាចរណ៍ផ្លូវគោកខេត្តឧត្តរមានជ័យ ស.ស.យ.ក ក្នុងវិស័យសាធារណការ និងដឹកជញ្ជូន និងមានការចូលរួមពី បងប្អូនមន្ត្រីរាជការ នៃមន្ទីរពាក់ព័ន្ធជុំវិញខេត្ត លោកគ្រូ អ្នកគ្រូ កងកម្លាំងទាំង៣ សិស្សានុសិស្ស យុវជន ស.ស.យ.ក.ខេត្តឧត្តរមានជ័យ សរុបប្រមាណជាង ១០០នាក់។ គោលបំណងនៃការរៀបចំយុទ្ធនាការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកនាពេលនេះ គឺដើម្បីពញ្ញាក់ស្មារតីដល់អ្នកប្រើប្រាស់ផ្លូវទាំងអស់ ជាពិសេសអ្នកប្រើប្រាស់ទោចក្រយានយន្ត ឱ្យយកចិត្តទុកដាក់ និងចូលរួមគោរពច្បាប់ស្តីពីចរាចរណ៍ផ្លូវគោក សំដៅចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោកឱ្យនៅកម្រិតទាប។ តាមរយៈរបាយការណ៍ស្តីពី គ្រោះថ្នាក់ចរាចរណ៍ផ្លូវគោក របស់ស្នងការនគរបាលខេត្តឧត្តរមានជ័យ បានឱ្យដឹងថា ក្នុងរយៈពេលជិត១១ខែ ឆ្នាំ២០២១ នេះ ខេត្តឧត្តរមានជ័យកើតមានគ្រោះថ្នាក់ចរាចរណ៍ចំនួន ៣៥លើក និងមានជនរងគ្រោះចំនួន ៨០នាក់ ក្នុងនោះមានអ្នកស្លាប់ចំនួន ១៧នាក់ អ្នករបួសធ្ងន់ ៣៨នាក់ និងអ្នករបួសស្រាល ២៥នាក់។ មូលហេតុដែលបណ្តាលឱ្យមានគ្រោះថ្នាក់ចរាចរណ៍នេះរួមមាន៖ ការបើកបរហួសល្បឿនកំណត់ ៩លើក មិនប្រកាន់ស្តាំ ៧លើក មិនគោរពសិទ្ធិអាទិភាព ៥លើក ស្រវឹង ៣លើក បត់មិនប្រុងប្រយ័ត្ន ៣លើក ជែងក្នុងស្ថានភាពគ្រោះថ្នាក់ ៣លើក បើកបរមិនប្រុងប្រយ័ត្ន ២លើក គោយន្តកន្ត្រៃមិនមានចំណាំងផ្លាត ២លើក និងឈប់មិនដាក់សញ្ញា ១លើក ។ លោក ឈាង ផល្លាង ប្រធានមន្ទីរសាធារណការ និងដឹកជញ្ជូនខេត្តឧត្តរមានជ័យ និងជាប្រធានលេខាធិការដ្ឋាន គ.ស.ច.គ. ខេត្តឧត្តរមានជ័យបានរាយការណ៍អំពីវឌ្ឍនភាពការងាររបស់មន្ទីរសាធារណការ និងដឹកជញ្ជូនខេត្តឧត្តរមានជ័យ ដែលបានអនុវត្តនាពេលកន្លងមកទាក់ទងនឹងការងារសុវត្ថិភាពចរាចរណ៍ផ្លូវគោក មានជាអាទិ៍ ការចុះអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកដល់អ្នកប្រើប្រាស់ផ្លូវ ការចុះពិនិត្យយានដ្ឋានកែច្នៃ ការត្រួតពិនិត្យលក្ខណៈបច្ចេកទេសរបស់យានយន្ត និងការបិទស្ទីកឃ័រចំណាំងផ្លាតជាដើម។ ឯកឧត្តម លឹម សុខតូ អភិបាលរងនៃគណៈអភិបាលខេត្តឧត្តរមានជ័យ បានអំពាវនាវដល់គ្រប់បណ្តាអ្នកពាក់ព័ន្ធ អាជ្ញាធរគ្រប់លំដាប់ថ្នាក់ វិស័យឯកជន អង្គការមិនមែនរដ្ឋាភិបាល បងប្អូនប្រជាពលរដ្ឋ ត្រូវបង្កើនកិច្ចសហការប្រតិបត្តិការឱ្យបានជិតស្និតដើម្បីចូលរួមអនុវត្តច្បាប់ស្តីពីចរាចរណ៍ផ្លូវគោកគ្រប់ៗគ្នាសំដៅប្រែក្លាយប្រទេសកម្ពុជាទៅជាប្រទេសគ្មានគ្រោះថ្នាក់ចរាចរណ៍។ ឯកឧត្តម ស៊ី ប្រាសិទ្ធ ប្រធានក្រុមប្រឹក្សាខេត្តឧត្តរមានជ័យ គូសបញ្ជាក់ថា គោយន្តគឺជាបញ្ហាសំខាន់មួយ ដែលបង្កឱ្យមានគ្រោះថ្នាក់ចរាចរណ៍ញឹកញាប់ ដោយសារគោយន្តទាំងនោះភាគច្រើនមិនមានបំពាក់ភ្លើងសញ្ញា និងមិនមានបិទស្ទីកឃ័រចំណាំងផ្លាត។ ឯកឧត្តម ក៏បានជំរុញឱ្យអ្នកប្រើប្រាស់ទោចក្រយានយន្តទាំងអស់ ជាពិសេសសិស្សានុសិស្សក្នុងខេត្តឧត្តរមានជ័យ ត្រូវពាក់មួកសុវត្ថិភាពឱ្យគ្រប់ពេលរាល់ពេលបើកបរ មិនថាធ្វើដំណើរទៅទីជិត ឬទីឆ្ងាយឡើយ។ ឯកឧត្តមបានណែនាំឱ្យនគរបាលចរាចរណ៍ផ្លូវគោកខេត្ត ត្រូវបន្តរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោកឱ្យបានជាប់ជាប្រចាំ ដើម្បីការពារអាយុជីវិតអ្នកប្រើប្រាស់ផ្លូវទាំងអស់ផងដែរ។ លោកជំទាវអគ្គលេខាធិការ គ.ស.ច.គ បានមានប្រសាសន៍ថា៖ បច្ចុប្បន្នចំនួនអ្នកឆ្លងជំងឺកូវីដ ១៩ នៅកម្ពុជា បានធ្លាក់ចុះពីមួយថ្ងៃទៅមួយថ្ងៃ ដោយឡែកចំនួនគ្រោះថ្នាក់ចរាចរណ៍ផ្លូវគោកនៅតែមានចំនួនការកើនឡើងនៅឡើយ ជាពិសេសអត្រាខ្ពស់នៃគ្រោះថ្នាក់ចំពោះអ្នកជិះម៉ូតូ និងអត្រាខ្ពស់នៃការមិនបានពាក់មួកសុវត្ថិភាពពេលមានគ្រោះថ្នាក់នៅតែបន្តកើតឡើង។ ប្រការនេះ ទាមទារឱ្យអ្នកប្រើប្រាស់ផ្លូវគ្រប់រូបបន្តពង្រឹងស្មារតីប្រុងប្រយ័ត្នក្នុងពេលបើកបរ និងត្រូវអនុវត្តឱ្យបានខ្ជាប់ខ្ជួនតាមច្បាប់ស្តីពីចរាចរណ៍ផ្លូវគោកទាំងអស់គ្នា ដើម្បីការពារអាយុជីវិតខ្លួនឯង និងអ្នកដទៃ ប្រកបដោយឆន្ទៈភ្ញាក់រលឹកខ្ពស់ សំដៅលើកស្ទួយកិត្តិយស សេចក្តីថ្លៃថ្នូរ និងសណ្តាប់ធ្នាប់សង្គមនៅក្នុងព្រះរាជាណាចក្រកម្ពុជា។ នៅក្នុងយុទ្ធនាការនេះ ក៏មានការណែនាំអំពី Cambodia Driving Rules កម្មវិធីថែទាំផ្លូវ (Road Care App) ព្រមទាំងការចែកជូននូវឯកសារមួយចំនួន ដូចជា សៀវភៅច្បាប់ស្តីពីចរាចរណ៍ផ្លូវគោក សៀវភៅអ្វីដែលអ្នកបើកបរទោចក្រយានយន្តត្រូវយល់ដឹង ខិត្តប័ណ្ណជំនួយស្មារតីស្តីពីសុវត្ថិភាពចរាចរណ៍ និងស្ទីកឃ័រចំណាំងផ្លាត។ នៅក្នុងយុទ្ធនាការនេះ ក៏មានការណែនាំដល់អ្នកចូលរួមក្នុងយុទ្ធនាការអំពីវិធានទប់ស្កាត់ជំងឺ Covid-19 តាមរយៈការរក្សាគម្លាត ការពាក់ម៉ាសការពារ ការថែរក្សាសុខភាព និងអនាម័យខ្លួនប្រាណតាមការណែនាំរបស់ក្រសួងសុខាភិបាល ដើម្បីចូលរួមចំណែកជាមួយរាជរដ្ឋាភិបាលក្នុងការទប់ស្កាត់ជំងឺ Covid-19 ផងដែរ។