ឯកឧត្តមរដ្ឋលេខាធិការ រស់ វណ្ណា ដឹកនាំកិច្ចប្រជុំបូកសរុបលទ្ធផលការងារ ០៩ខែ របស់នាយកដ្ឋានក្រោមឱវាទ នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ដើម្បីពិនិត្យវាយតម្លៃលើវឌ្ឍនភាពការងារដែលបានអនុវត្ត ថ្ងៃសុក្រ ០១រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២២ ខែតុលា ឆ្នាំ២០២១ នៅទីស្ដីការក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំបូកសរុបលទ្ធផលការងារ ០៩ខែ របស់នាយកដ្ឋាននាវាជំនួញសមុទ្រ នាយកដ្ឋានហេដ្ឋារចនាសម្ព័ន្ធផ្លូវទឹក និងសំណង់កំពង់ផែ នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ដោយមានការចូលរួមពី ឯកឧត្តមអនុរដ្ឋលេខាធិការទទួលបន្ទុក ឯកឧត្តមអគ្គនាយក-អគ្គនាយករងនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ រួមទាំងលោកប្រធាន-អនុប្រធាននាយកដ្ឋាន មន្ត្រីនៃនាយកដ្ឋានជំនាញទាំងពីរផងដែរ ។ កិច្ចប្រជុំនេះធ្វើឡើងក្នុងគោលបំណង ពិនិត្យវាយតម្លៃលើវឌ្ឍនភាពការងារដែលបានអនុវត្តរបស់នាយកដ្ឋានទាំងពីរ សមស្របតាមផែនការគ្រោងទុក។ ក្រោយពីបានស្តាប់ការធ្វើបទបង្ហាញរបស់នាយកដ្ឋានទាំងពីររួចមកលើលទ្ធផល និងបញ្ហាប្រឈមផ្សេងៗ ឯកឧត្តមប្រធានអង្គប្រជុំក៏បានកោតសរសើរនូវការខិតខំប្រឹងប្រែងរបស់ថ្នាក់ដឹកនាំ និងមន្ត្រីទាំងអស់ និងបានផ្តល់នូវអនុសាសន៍ណែនាំមួយចំនួនទៅលើចំនុចខ្វះខាត និងបញ្ហាប្រឈម ដើម្បីធ្វើយ៉ាងណាឱ្យការបំពេញការងាររបស់នាយកដ្ឋានកាន់តែមានប្រសិទ្ធភាពជាងមុន៕