លោក ថោង ខុន​ រដ្ឋមន្ត្រីក្រសួងទេសចរណ៍បាននិយាយថា កំពង់ផែទេសចរណ៍អន្តរជាតិកំពត នឹងក្លាយជាច្រកទ្វារអន្តរជាតិដ៏សំខាន់មួយសម្រាប់ទាក់ទាញភ្ញៀវទេសចរជាតិ និង អន្តរជាតិ ហើយនឹងត្រូវបញ្ចប់នៅចុងឆ្នាំ ២០២១ ។ ឯកឧត្តមរដ្ឋមន្ត្រីបានថ្លែងបែបនោះ នៅពេលដែលគាត់កំពុងពិនិត្យមើលការសាងសង់កំពង់ផែទេសចរណ៍ដែលមានទីតាំងស្ថិតនៅក្នុងស្រុកទឹកឈូ ខេត្តកំពត។ ការសាងសង់កំពង់ផែទេសចរណ៍អន្តរជាតិនេះ បានចាប់ផ្តើមនៅថ្ងៃទី ៨ ខែសីហាឆ្នាំ ២០១៨ ហើយការដ្ឋានបានបញ្ចប់ប្រមាណ ៨៤ភាគរយ ចំណែកឯ ការសាងសង់អាគារផ្ទុកអ្នកដំណើរសម្រេចបានប្រមាណ ៧៣ភាគរយ ដែលនឹងបញ្ចប់នៅចុងឆ្នាំ ២០២១ផងដែរ។ គម្រោងសាងសង់កំពង់ផែទេសចរណ៍អន្តរជាតិ គឺជាគម្រោងហិរញ្ញប្បទានរបស់ធនាគារអភិវឌ្ឍន៍អាស៊ី ដែលជាផ្នែកមួយនៃគម្រោងអភិវឌ្ឍន៍ហេដ្ឋារចនាសម្ព័ន្ធកំណើនទេសចរណ៍របស់ GMS TIIG លេខ៣១៩៤-CAM (COL) សម្រាប់អនុតំបន់មេគង្គ (GMS)។ គំរោងនេះ ស្ថិតនៅក្រោមការគ្រប់គ្រងរបស់អង្គភាពអនុវត្តអនុគម្រោងនៃក្រសួងសាធារណការ និងដឹកជញ្ជូន។ កំពង់ផែសមុទ្រនេះមានប្រវែង ៣០០ ម៉ែត្រ និងអាចផ្ទុកកប៉ាល់ដឹកអ្នកដំណើរ៣០០ទៅ៤០០នាក់។ ទន្ទឹមនឹងនេះ កំពង់ផែនេះ គឺជាកំពង់ផែទេសចរណ៍អន្តរជាតិដែលគ្រោងនឹងផ្ទុកអ្នកទេសចរ និងអ្នកដំណើរប្រមាណ ១លាននាក់។ កំពង់ផែនេះ ក៏ត្រូវបានរៀបចំឡើងតាមស្តង់ដារអន្តរជាតិផងដែរ ហើយវានឹងក្លាយជាច្រកទ្វារអន្តរជាតិសំខាន់មួយ តាមសមុទ្រ តភ្ជាប់អ្នកទេសចរទៅកាន់កោះភាគខាងត្បូង និងតភ្ជាប់ខេត្តកំពតនៃប្រទេសកម្ពុជាទៅកាន់ពិភពលោក។ តាមរយៈកំពង់ផែនេះ វានឹងជួយជំរុញការអភិវឌ្ឍន៍វិស័យទេសចរណ៍ និងវិស័យពាក់ព័ន្ធនៅខេត្តកំពត រមណីយដ្ឋានភ្នំបូកគោ និងគោលដៅទេសចរណ៍តំបន់ឆ្នេររបស់កម្ពុជា៕