កែប ៖ នៅរសៀលថ្ងៃទី៦ ខែកញ្ញា ឆ្នាំ២០២១នេះ ឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែប បាន អញ្ជើញចុះពិនិត្យការដ្ឋានសាងសង់ស្ថានីយថ្លឹងរថយន្តអចល័តដំណាក់ចង្អើរ ផ្លូវជាតិលេខ ៣៣ ត្រង់គ.មលេខ២១ ដល់៥៨៥ ស្ថិតនៅ ភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប។ ក្នុងពិធីចុះពិនិត្យការដ្ឋាននាឱកាសនោះ ឯកឧត្តម សោម ពិសិដ្ឋ អភិបាលខេត្តកែប មានប្រសាសន៍ថា ការសាសង់ស្ថានីយ៍ថ្លឹងរថយន្តនេះ គឺដើម្បីថែរក្សាផ្លូវជាតិលេខ ៣៣ ឱ្យបានយូរអង្វែង ព្រោះផ្លូវជាតិមួយខ្សែនេះនឹងកសាងឡើងវិញនៅចុងឆ្នាំ២០២១នេះ ជាការចាំបាច់ គឺត្រូវមានកន្លែងសម្រាប់ពិនិត្យនូវទម្ងន់រថយន្តដែលផ្ទុកលើសចំណុះ ដែលជាកត្តាធ្វើឱ្យផ្លូវជាតិប្រេះស្រាំ ជង្ហុកធំៗ និងអាចបង្កឱ្យមាន គ្រោះថ្នាក់ដល់អ្នកបើកបរផ្សេងទៀតបាន ហើយការបង្កើតឡើងនៅស្ថានីយថ្លឹងរថយន្តនេះ ក៏ជាការងាយស្រួលក្នុងការតម្រង់ទិស រថយន្តដឹកលើសទម្ងន់ដែលច្បាប់បានកំណត់។ ឯកឧត្តមបន្តថា ខេត្តកែបជាខេត្តមួយដែលមានផ្លូវជាតិតភ្ជាប់ពីខេត្តផ្សេងៗគឺ កោះកុង ព្រះសីហនុ តាកែវ កំពត ដែលជាផ្លូវដឹកជញ្ជូន ដ៏មានសារសំខាន់បំផុត ក្នុងការដឹកជញ្ជូនទំនិញនិងដោះដូរទំនិញ ទៅកាន់បណ្ដាច្រកទ្វាអន្តរជាតិ (ព្រែកចាក ខេត្ត កំពត )-ច្រកទ្វា អន្តរជាតិចាំយាម ខេត្តកុងកោះ និងកំពង់ផែអន្តរជាតិទឹកជ្រៅ ខេត្តព្រះសីហនុដ៏សំខាន់ផងដែរ។ ឯកឧត្តម អភិបាលខេត្តក៏បានបញ្ជាក់ថា ស្ថានីយថ្លឹងរថយន្តនេះ ជាសមិទ្ធផលថ្មីមួយបន្ថែមទៀតរបស់ខេត្តកែប បន្ទាប់ពីផែទេសចរណ៍ កោះទន្សាយ ដែលដាក់ឲ្យប្រើប្រាស់ជាបណ្តោះអាសន្ននៅចុងឆ្នាំ២០២១ និងកំពង់ផែសេះស ដែលគ្រោងសាងសង់រួចរាល់ជាស្ថាពរ យ៉ាងយូរឆ្នាំ២០២៣ ហើយនិងមានការបើកការដ្ឋានសាងសង់កំពង់ផែទេសចរណ៍ នៅលើកោះទន្សាយមួយទៀត ក្នុងពេលឆាប់ៗខាងមុខ នេះ។ ឯកឧត្តមសង្ឃឹមថា សមិទ្ធផលទាំងអស់នេះ នឹងអាចប្រមូលនូវថវិកាចូលជាតិ និងបម្រើផលប្រយោជន៍ប្រជាជនក្នុងខេត្តកែប ឲ្យមាន ជីវភាពធូរធារមួយកម្រិតថែមទៀត ។ ឯកឧត្តម ក៏បានអំពាវនាវដល់បងប្អូនប្រជាពលរដ្ឋទាំងអស់ សូមចូលរួមទទួលការចាក់វ៉ាក់សាំង បង្ការជំងឺកូវីដ-១៩ ឲ្យបានគ្រប់ៗគ្នា និងត្រូវចូលរួមអនុវត្តវិធានការនានារបស់ក្រសួងសុខាភិបាល ជាពិសេសវិធានការ ៣ការពារ ៣កុំ របស់រាជរដ្ឋាភិបាលឲ្យបានជាប់ជាប្រចាំ៕