ភ្នំពេញ ថ្ងៃទី​១៩ ខែ​សីហា ឆ្នាំ​២០២១--ឯកឧត្ដម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលខ្លី ស្តីពីការប្រើប្រាស់ប្រព័ន្ធប្រជុំពីចម្ងាយ តាមរយៈកម្មវិធី Zoom កាលពី​ថ្ងៃ៨កើត ខែស្រាពណ៍ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃពុធ ទី១៨ ខែសីហា ឆ្នាំ២០២១ នៅទីស្តីការក្រសួង។នៅក្នុង​ឱកាសនោះ ឯកឧត្តម កែន រដ្ឋា គូសបញ្ជាក់អំពីសារៈសំខាន់នៃការប្រើប្រាស់ប្រព័ន្ធប្រជុំពីចម្ងាយ ដែលអាចឱ្យមន្ត្រីបំពេញការងារពីចម្ងាយ និងជាដំណោះស្រាយ ប្រកប ដោយប្រសិទ្ធភាព នៅក្នុងបរិបទនៃការឆ្លងរីករាលដាលជំងឺកូវីដ-១៩ ស្របតាមគោលការណ៍ណែនាំរបស់ក្រសួងសុខាភិបាល។ជាមួយគ្នានេះផងដែរ ឯកឧត្តមអគ្គនាយក បានលើកឡើងនូវការយកចិត្តទុកដាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល ទាក់ទងនឹងការចាក់វ៉ាក់សាំងបង្ការជំងឺកូវីដ-១៩ ជូនមន្ត្រីរាជការក្រសួង ការបញ្ជាទិញឧបករណ៍ធ្វើតេស្តរហ័សរកមេរោគកូវីដ-១៩ (Rapid Test) ការជំរុញឱ្យមានការរៀបចំវគ្គបណ្តុះបណ្តាលខ្លី ស្តីពីការប្រើប្រាស់បច្ចេកវិទ្យាប្រព័ន្ធប្រជុំពីចម្ងាយតាមរយៈកម្មវិធី Zoom License ដែលក្រសួងបានផ្តល់ទៅឱ្យអង្គភាពនានា ដើម្បីប្រើប្រាស់ និងចាត់ចែងកិច្ចប្រជុំផ្សេងៗ និងការរៀបចំឱ្យមានមណ្ឌលចត្តាឡីស័ករបស់ក្រសួង សម្រាប់ មន្ត្រី ដែលមានការឆ្លងជំងឺកូវីដ-១៩ ហើយគ្មានលទ្ធភាពធ្វើចត្តាឡីស័កនៅផ្ទះ។ ទន្ទឹមនឹងនេះ ឯកឧត្តមអគ្គនាយក បាន​លើកទឹកចិត្តឱ្យមន្ត្រីបង្គោលទាំងអស់ យកចិត្តទុកដាក់រៀនសូត្រឱ្យបានហ្មត់ចត់ ដើម្បីទទួលបានចំណេះដឹង និងបទពិសោធន៍ពីមន្ត្រីជំនាញ អាចយកទៅប្រើប្រាស់ប្រកបដោយ ប្រសិទ្ធភាពនៅក្នុងអង្គភាពរបស់ខ្លួនផ្ទាល់ និងបានថ្លែងអំណរគុណយ៉ាងជ្រាលជ្រៅដល់នាយកដ្ឋានព័ត៌មានវិទ្យា និងទំនាក់ទំនង ដែលបានខិតខំប្រឹងប្រែងរៀបចំវគ្គបណ្តុះបណ្តាលខ្លីនេះឡើង។ សូមបញ្ជាក់ថា វគ្គបណ្តុះបណ្តាលនេះត្រូវបាន​រៀបចំឡើង​ ដើម្បី​ចែករំលែកចំណេះដឹង និងបទពិសោធន៍ដល់មន្ត្រី ឱ្យចេះប្រើប្រាស់បច្ចេកវិទ្យា ប្រព័ន្ធប្រជុំពីចម្ងាយ (Online Video Conference) តាមរយៈកម្មវិធី Zoom ដើម្បីបម្រើដល់អង្គភាពរបស់ខ្លួនតាមតម្រូវការចាំបាច់ សំដៅជួយសម្រួលការងារឱ្យមានប្រសិទ្ធភាព កាត់បន្ថយការជួបជុំគ្នាច្រើនដែលបង្កហានិភ័យជាយថាហេតុណាមួយ នៅក្នុងបរិបទជំងឺកូវីដ-១៩នេះ និង​ផ្ដោតជាសំខាន់លើការHostingកិច្ចប្រជុំតាមរយៈ Zoom License ដែលរយៈពេលលើសពី៤០នាទី (Unlimited) របៀបចូលរួមប្រជុំតាមរយៈកម្មវិធី Zoom របៀបប្រើប្រាស់ Online Video Conference សម្រាប់ការប្រជុំរបៀប Host Online Video Conference របៀបប្រើប្រាស់ និងគ្រប់គ្រង កម្មវិធីពេលប្រជុំ Online Video Conference និងរូបភាពតំណភ្ជាប់សម្រាប់ធ្វើការប្រជុំតាម Online Video Conference រចនាសម្ព័ន្ធនៃប្រព័ន្ធ និងការទទួលខុសត្រូវសម្រាប់អ្នកកាន់ Host ប្រជុំផងដែរ៕