ភ្នំពេញ ថ្ងៃទី​២៦ ខែ​ឧសភា ឆ្នាំ​២០២១--ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន និង​ជាប្រធានគ្រប់គ្រងនិងសម្របសម្រួលគម្រោងបានដឹកនាំកិច្ចប្រជុំក្រុមការងារ “Working Group” លើកទី២៤ ក្នុងគម្រោងអភិវឌ្ឍន៍សមត្ថភាពសម្រាប់ការងារគ្រប់គ្រងទឹកកខ្វក់ ក្នុង​រដ្ឋបាលរាជធានីភ្នំពេញ និងក្រសួងសាធារណការ និងដឹកជញ្ជូន ក្រោមជំនួយសហ​ប្រតិ​បត្តិ​ការបច្ចេកទេសពីប្រទេសជប៉ុន។ កិច្ចប្រជុំនេះ បានធ្វើឡើង កាលពីថ្ងៃ១៤កើត ខែជេស្ឋ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃអង្គារ ទី២៥ ខែឧសភា ឆ្នាំ២០២១ នៅទីស្ដី​ការ​ក្រសួងសាធារណការ និងដឹកជញ្ជូន។ ឯកឧត្តម កឹម បូរី បានមាន​ប្រសាសន៍លើកទឹកចិត្តក្រុមការងារបច្ចេកទេស​នៃទីភ្នាក់​ងារសហប្រតិបត្តិការអន្តរជាតិជប៉ុន រៀបចំផែនការមេឱ្យបានច្បាស់លាស់ និងប្រើប្រាស់ យន្តការសិក្សាស៊ីជម្រៅ ស្របតាមទិសដៅ និងគោលនយោបាយ​របស់រាជរដ្ឋាភិបាល ដើម្បីសម្រេចឱ្យបាននូវការគ្រប់គ្រងទឹកកខ្វក់ឱ្យមានប្រសិទ្ធភាព និងប្រកបដោយការ ទទួលខុសត្រូវខ្ពស់។ ជាមួយគ្នានេះដែរ អង្គប្រជុំបានជជែកពិភាក្សា និងស្វែងរកដំណោះស្រាយជាមួយ ក្រុមការងារបច្ចេកទេសក្នុងការធ្វើឱ្យប្រសើរឡើងនូវប្រព័ន្ធលូបង្ហូរទឹកកខ្វក់ ដើម្បីបង្កើត ផែនការសកម្មភាពឱ្យបានទូលំទូលាយ និងពិនិត្យមើលភាពងាយស្រួលនៃការតភ្ជាប់ ប្រព័ន្ធលូបង្ហូរទឹកកខ្វក់ ដើម្បីកំណត់ពីស្ថានភាពលំហូរទឹកឱ្យបានច្បាស់លាស់ សំដៅ ធានាឱ្យបាននូវបរិស្ថានស្អាត និងសុខភាព អនាម័យសាធារណៈ និងលើកកម្ពស់ជីវភាព រស់របស់ប្រជាពលរដ្ឋឱ្យកាន់តែប្រសើរឡើង៕