ក្រសួងសាធារណការ និងដឹកជញ្ជូន បានណែនាំឱ្យក្រុមការងារទទួលបន្ទុករៀបចំសេចក្តីព្រាងច្បាប់ស្តីពី ទឹកកខ្វក់ និងប្រព័ន្ធលូ កែប្រែនីតិវិធីនៃការប្រជុំដើម្បីពន្លឿនការរៀបចំសេចក្ដីព្រាងច្បាប់នេះឱ្យបានចប់សព្វគ្រប់។ កាលពីថ្ងៃទី០៦ ខែមករា ឆ្នាំ២០២១ នៅទីស្ដីការក្រសួង លោក កឹម បូរី អនុរដ្ឋលេខាធិការ និងជាអនុប្រធានក្រុមការងារ តំណាង លោក ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សា បន្តលើសេចក្តីព្រាងច្បាប់ស្តីពី ទឹកកខ្វក់ និងប្រព័ន្ធលូ។ អង្គប្រជុំបានជជែកពិភាក្សាលើមាត្រា ៣០ (២៧ថ្មី) នៃសេចក្តីព្រាងច្បាប់នេះ ដើម្បីកែសម្រួល និងកំណត់យកឃ្លា ប្រយោគ ពាក្យពេចន៍ឱ្យបានច្បាស់លាស់ និងគ្រប់ជ្រុងជ្រោយស៊ីជម្រៅបន្ថែមទៀត ចៀសវាងការបកស្រាយខុសនៅពេលអនុវត្ត។ លោកអនុរដ្ឋលេខាធិការ បានមានប្រសាសន៍ថា៖ យើងបានអាក់ខានប្រជុំពិនិត្យលើសេចក្តីព្រាងច្បាប់នេះមួយរយៈកន្លងមក ដើម្បីចូលរួមជាមួយរាជរដ្ឋាភិបាលក្នុងការទប់ស្កាត់ការរីករាលដាលនៃជំងឺកូវីដ-១៩ ហើយដើមឆ្នាំថ្មីនេះ ក្រុមការងារយើងនឹងសិក្សាលើសេចក្តីព្រាងច្បាប់នេះបន្តទៀត។ ជាមួយគ្នានោះផងដែរ ឯកឧត្តមអនុរដ្ឋលេខាធិការ បានណែនាំឱ្យក្រុមការងារទទួលបន្ទុករៀបចំសេចក្តីព្រាងច្បាប់នេះកែប្រែ នីតិវិធីនៃការប្រជុំធ្វើយ៉ាងណាឱ្យការរៀបចំសេចក្ដីព្រាងច្បាប់នេះ មានសន្ទុះទៅមុខកាន់ តែលឿន និងបានជំរុញឱ្យមានការប្រជុំឱ្យបានញឹកញាប់ ហើយរក្សាទុកចំណុចណាដែលមិនទាន់ឯកភាពគ្នា ជូនថ្នាក់ដឹកនាំលេខាធិការដ្ឋានដើម្បីសម្រេច។ លោក ក៏បានថ្លែងអំណរគុណយ៉ាងជ្រាលជ្រៅចំពោះក្រុមការងារដែលបានចូលរួម យ៉ាងផុលផុសក្នុងការផ្ដល់មតិយោបល់ប្រកបដោយខ្លឹមសារ និងដែលបានផ្តល់ធាតុចូលសំខាន់ៗ ក្នុងការកំណត់ចំណងជើង កែតម្រូវ ឃ្លាប្រយោគឱ្យសេចក្ដីព្រាងច្បាប់នេះ មានអត្ថន័យគ្រប់ជ្រុងជ្រោយ ប្រកប ដោយគុណភាព ដើម្បីដាក់ឆ្លងទៅអន្តរក្រសួងអនុម័តនាពេលខាងមុខ។ ជាទីបញ្ចប់ អង្គប្រជុំបានឯកភាពកែសម្រួលអត្ថន័យនៃមាត្រា ៣០ (២៧ថ្មី) ដើម្បីឱ្យមានខ្លឹមសារគ្រប់គ្រាន់ ជាមូលដ្ឋានគ្រឹះពាក់ព័ន្ធការងារបច្ចេកទេសផ្សេងៗដូចជា៖ ការសាងសង់ ត្រូវអនុវត្តស្របតាមច្បាប់កំណត់ បទដ្ឋានបច្ចេកទេស ស្ថិរភាព និងមានភាពច្បាស់លាស់ផងដែរ៕