[Bayon TV] - JICA នឹងផ្ដល់ជំនួយ២៧លានដុល្លារដល់កម្ពុជា សម្រាប់សាងសង់រោងចក្រចម្រោះទឹកស្អុយ
2018-02-12
Go to the website published Bayon TV
ភ្នំពេញ ៖ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានថ្លែងឲ្យដឹងថា ទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា (JICA)នឹងផ្តល់ជំនួយ២៧លានដុល្លារ ដើម្បីសាងសង់រោងចក្រចម្រោះទឹកស្អុយជំហានទី១ នៅក្នុងតំបន់ជើងឯក រាជធានីភ្នំពេញ។
លោក សាំ ពិសិទ្ធ ប្រធានមន្ទីសាធារណការ និងដឹកជញ្ជូនរាជធានីភ្នំពេញ បានលើកឡើង នៅក្នុងពិធីបញ្ជ្រាបផ្សព្វផ្សាយពីប្រព័ន្ធលូ នៅរាជធានីភ្នំពេញ ដែលរៀបចំដោយមន្ទីរសាធារណការ និងដឹកជញ្ជូន និងក្រុងឃីតាឃ្យូស្យ៊ូ នាព្រឹកថ្ងៃទី១២ កុម្ភៈនេះថា ដើម្បីកាត់បន្ថយដល់បញ្ហាបរិស្ថាន ការភាយបំពុល និងធ្វើឲ្យប៉ះពាល់ដល់បញ្ហាសុខភាព រាជធានីភ្នំពេញនឹងទទួលបានគម្រោងជំនួយពី JICA ដើម្បីសាងសង់រោងចក្រចម្រាញ់ទឹកស្អុយជំហានទី១ ដែលមានទឹកប្រាក់ប្រមាណ២៧លានដុល្លារ ដើម្បីអនុវត្តន៍សាងសង់គម្រោងនេះ នៅតំបន់ជើងឯក ខណ្ឌដង្កោ រាជធានីភ្នំពេញ ក្នុងគោលដៅបញ្ជៀសបញ្ហាទឹកកខ្វក់។
លោក បន្តថា នៅរាជធានីភ្នំពេញគឺពុំទាន់មានស្ថានីយ ប្រព្រឹត្តកម្មទឹកកខ្វក់ មុននឹងបង្ហូរចូលទន្លេ បឹងបួរ នានា ហើយបច្ចុប្បន្នបញ្ហាទឹកកខ្វក់នេះ កំពុងបំពុលទឹកទន្លេ និងបឹងបួរមួយចំនួន នៅប៉ែកខាងត្បូង និងខាងជើងរាជធានីភ្នំពេញ។
លោក សាំ ពិសិទ្ធ បានបញ្ជាក់ឲ្យដឹងថា បច្ចុប្បន្ននៅរាជធានីភ្នំពេញ មានប្រព័ន្ធបង្ហូរទឹកភ្លៀង មានដូចជា បណ្ដាញលូមូល លូប្រអប់ លូជ្រុងគ្រប់ប្រភេទ និងប្រវែងប្រមាណ៧ម៉ឺនម៉ែត្រ, អណ្ដូងលូគ្រប់ប្រភេទចំនួនជាង៤ម៉ឺនអណ្ដូងលូ, ប្រឡាយចំហរបង្ហូរទឹកភ្លៀង និងទឹកកខ្វក់សរុបប្រវែងជិត៦ម៉ឺនម៉ែត្រ ក្នុងនោះប្រឡាយបេតុងមានប្រវែងជាង៣ម៉ែត្រ និងមានស្ថានីយ៍បូមទឹកជុំវិញទីក្រុងចំនួន១៣ស្ថានីយផងដែរ៕
