ថ្ងៃអង្គារ ១១រោច ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៣ ខែតុលា ឆ្នាំ២០២០ នៅទីស្តីការក្រសួង ឯកឧត្ដម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានទទួលជួបសំណេះសំណាល និងផ្ដល់អនុសាសន៍ជូនបេក្ខជនជ័យលាភីអាហារូបករណ៍រដ្ឋាភិបាលអូស្ត្រាលី និងណូវែលហ្សេឡង់ឆ្នាំ២០២០ ចំនួន២៧រូប ដោយមានការចូលរួមពីមន្ត្រីជាន់ខ្ពស់ក្រសួងសាធារណការ និងដឹកជញ្ជូន។ ការជួបសំណេះសំណាលនេះធ្វើឡើងដើម្បីផ្ដល់អនុសាសន៍ ណែនាំ ក៏ដូចជាបង្ហាញពីវឌ្ឍនភាពវិស័យសាធារណការ និងដឹកជញ្ជូន ជូនបេក្ខជនជ័យលាភីឱ្យបានជ្រាបច្បាស់ពីការរីកចម្រើនខាងវិស័យនេះ មុននឹងចេញដំណើរទៅបន្តការសិក្សានៅប្រទេសអូស្ត្រាលី និងណូវែលហ្សេឡង់។ ឯកឧត្តមរដ្ឋលេខាធិការ បានជម្រាបជូនអំពីការកែទម្រង់វិស័យដឹកជញ្ជូនដោយប្រើយន្តការព័ត៌មានវិទ្យា ជាវេទិកាក្នុងការបម្រើសេវាសាធារណៈ ការបង្ខិតសេវាសាធារណៈឱ្យកៀកប្រជាពលរដ្ឋតាមរយៈបង្កើត មណ្ឌលផ្ដល់សេវាសាធារណៈនៅតាមបណ្ដាផ្សារទំនើប អ៊ីអនម៉ល១ អ៊ីអនម៉ល២ និងផ្សារទំនើបជីបម៉ុង ណូរ៉ូ ម៉ល ជាដើម ព្រមទាំងយុទ្ធនាការនានាក្នុងការទប់ស្កាត់គ្រោះថ្នាក់ចរាចរណ៍ផងដែរ។ ជាមួយគ្នានោះផងដែរ ឯកឧត្ដមរដ្ឋលេខាធិការ បានជម្រាបជូនអំពីគោលនយោបាយអភិវឌ្ឍហេដ្ឋារចនា សម្ព័ន្ធតាមដំណាក់កាលរបស់រាជរដ្ឋាភិបាល ការធ្វើសមាហរណកម្មហេដ្ឋារចនាសម្ព័ន្ធក្នុងស្រុក និងក្នុងតំបន់ គម្រោងធ្វើទំនើបកម្ម គម្រោងសាងសង់ផ្លូវ ស្ពាន និងកំពង់ផែ ស្របតាមការរីកចម្រើនសេដ្ឋកិច្ចជាតិ សេដ្ឋកិច្ចក្នុងតំបន់ និងពិភពលោកក្នុងបរិបទបដិវត្តន៍ឧស្សាហកម្ម៤.០។ ឯកឧត្ដមរដ្ឋលេខាធិការ បានផ្តាំផ្ញើឱ្យបេក្ខជនជ័យលាភីយកចិត្តទុកដាក់ខ្ពស់ក្នុងការថែទាំសុខភាព ខិតខំរៀនសូត្រ ប្រកាន់ខ្ជាប់នូវអាកប្បកិរិយាថ្លៃថ្នូរ ប្រព្រឹត្តអំពើល្អ និងត្រូវចង់ចាំថា បេក្ខជនម្នាក់គឺជាអ្នក នាំពាក្យ ឬជាអគ្គរាជទូតសុឆន្ទៈម្នាក់ក្នុងការផ្សព្វផ្សាយពីសន្តិភាព ស្ថិរភាព និងការអភិវឌ្ឍដល់បណ្ដាមិត្តមកពីប្រទេសផ្សេងៗ ឱ្យគេយល់ច្បាស់ពីស្ថានភាពអភិវឌ្ឍនៅកម្ពុជា ជាពិសេស ឆ្លៀតឱកាសស្វែងយល់វប្បធម៌ អរិយធម៌ និងការរីកចម្រើនរបស់ប្រទេសដទៃ ដើម្បីទទួលបទពិសោធន៍ល្អៗសម្រាប់អភិវឌ្ឍប្រទេសជាតិ យើងឱ្យកាន់តែមានការរីកចម្រើនថែមទៀត៕