AKP ភ្នំពេញ ថ្ងៃទី២៧ ខែ​ឧសភា ឆ្នាំ​២០២០ -- ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអនុញ្ញាតឱ្យឯកឧត្តម Park Heung-Kyeong ឯកអគ្គរដ្ឋទូតនៃសាធារណរដ្ឋកូរ៉េប្រចាំនៅកម្ពុជា អមដំណើរដោយលោក Yun Hyun Cheol អនុព័ន្ធសហប្រតិបត្តិការអភិវឌ្ឍន៍ ចូលជួប​សម្ដែង​ការ​គួរសម ​និង​ពិភាក្សាការងារ​ កាលពីថ្ងៃអង្គារ ៥កើត ខែជេស្ឋ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២៦ ខែឧសភា ឆ្នាំ២០២០ នៅទីស្តីការក្រសួង​។ កិច្ច​ពិភាក្សាការងារនេះបានផ្ដោតជាសំខាន់លើកិច្ចសហប្រតិបត្តិការលើ គម្រោងអភិវឌ្ឍន៍ហេដ្ឋារចនាសម្ព័ន្ធនៅកម្ពុជាឱ្យកាន់តែមានការរីកចម្រើន និងប្រកបដោយគុណភាពរឹងមាំ ប្រើប្រាស់ជាប់បានយូរ និងកាត់បន្ថយការខ្ជះខ្ជាយថវិកាជាតិក្នុងការថែទាំជួសជុល។ នៅក្នុងឱកាសនោះ ឯកឧត្តមទេសរដ្ឋមន្ត្រី បានមានប្រសាសន៍អំពីវឌ្ឍនភាពនៃគម្រោង​សាងសង់ផ្លូវជាតិលេខ២ និងផ្លូវជាតិលេខ២២ អំពីការបំពេញការងារប្រកបដោយការទទួលខុសត្រូវ ការសាងសង់ហេដ្ឋារចនាសម្ព័ន្ធផ្លូវថ្នល់ ប្រកបដោយគុណភាពរឹងមាំ និងវិស័យអាទិភាពសំខាន់ៗរបស់ក្រសួងសាធារណការ និងដឹកជញ្ជូន និង​បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការល្អរវាងប្រទេសទាំងពីរកម្ពុជា-កូរ៉េ។ ទន្ទឹមនឹងនេះ ឯកឧត្តម​ទេសរដ្ឋមន្ត្រី​បានសម្តែងការស្វាគមន៍ចំពោះកិច្ចសហការជាមួយរដ្ឋាភិបាលកូរ៉េ ក្នុងការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូននៅកម្ពុជាឱ្យមានការរីកចម្រើននៅក្នុងតំបន់ ដោយស្មារតីយកចិត្តទុកដាក់ខ្ពស់ ។ ឯកឧត្តម ក៏​បានមាន​ប្រសាសន៍ថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនៃសាធារណរដ្ឋកូរ៉េ ក៏ដូចជាប្រជាជនកូរ៉េ ដែលបានផ្ដល់ការគាំទ្រផ្នែកបច្ចេកទេស និងហិរញ្ញវត្ថុដល់ការអភិវឌ្ឍវិស័យហេដ្ឋារចនាសម្ព័ន្ធផ្លូវថ្នល់របស់ព្រះរាជាណាចក្រកម្ពុជា ឱ្យមានការរីកចម្រើននាពេលកន្លងមក។ ជាមួយគ្នានេះដែរ ឯកឧត្តមឯកអគ្គរដ្ឋទូតបានសម្តែងការប្តេជ្ញាចិត្តយ៉ាងមុតមាំក្នុង​ការ​ជួយជ្រោមជ្រែងដើម្បីធ្វើយ៉ាងណាឱ្យគម្រោងសាងសង់ផ្លូវជាតិលេខ២ និងផ្លូវជាតិ​លេខ​២២ បានអនុវត្តន៍ទាន់ពេលវេលាតាមការគ្រោងទុកប្រកបដោយគុណភាពរឹងមាំ និងអាចប្រើប្រាស់ជាប់បានយូរអង្វែង។ ឯកឧត្តមឯកអគ្គរដ្ឋទូត ក៏បានស្នើសុំឯកឧត្តមទេសរដ្ឋមន្រ្តីផ្តល់ការគាំទ្រ និងកិច្ចសហការលើគម្រោងអភិវឌ្ឍន៍ហេដ្ឋារចនាសម្ព័ន្ធនៅកម្ពុជា និងប្តេជ្ញាចិត្តយ៉ាងមុតមាំថានឹងបន្តជួយដល់កម្ពុជាលើការកសាងហេដ្ឋារចនាសម្ព័ន្ធប្រកបដោយគុណភាពរឹងមាំ ប្រើប្រាស់បានយូរអង្វែង៕ ដោយ ទេស ច័ន្ទសុធារី