មកដល់ពេលនេះ ការដ្ឋានសាងសង់ស្ពានឆ្លងកាត់ទន្លេមេគង្គ ស្ទឹងត្រង់-ក្រូចឆ្មារ សម្រេចបាន ៧៥ ភាគរយហើយ ។ ការសាងសង់ស្ពានរនេះឡើងគឺក្នុងគោលបំណងដើម្បីជួយសម្រួលដល់ការធ្វើដំណើរ និង ការដឹកជញ្ជូនផលដំណាំ ឬ ទំនិញផ្សេងៗពីស្រុកមួយទៅស្រុកមួយ ពីខេត្តមួយទៅខេត្តមួយ ។ ស្ពានឆ្លងកាត់ទន្លេមេគង្គ ដើម្បីតភ្ជាប់ស្រុកស្ទឹងត្រង់ ខេត្តកំពង់ចាម  និង ស្រុកក្រូចឆ្មារ ខេត្តត្បូងឃ្មុំនេះ បានបើកការដ្ឋានស្ថាបនា កាលពីថ្ងៃទី៨ ខែកុម្ភៈ ឆ្នាំ២០១៨ ​ក្រោមអធិបតីភាព សម្តេចអគ្គមហាសេនាបតីតេជោ ហ៊ុន សែន  នាយករដ្ឋមន្ត្រីនៃព្រះរាជាណាចក្រកម្ពុជា ។ ស្ពាននេះ មានបណ្តោយប្រវែង ១ ១៣១ ម៉ែត្រ , ទទឹងប្រវែង ១៣.៥០ ម៉ែត្រ ។ ការសាងសង់ស្ពាននេះ ប្រើរយៈពេលចំនួន ៤២ខែ គឺគិតចាប់ពីខែកុម្ភៈ ឆ្នាំ២០១៨ ហើយគ្រោង​បញ្ចប់នានៅដើមឆ្នាំ២០២១ ដែលគ្រោងចំណាយថវិកាសរុបជិត ៥៧លានដុល្លារអាមេរិក ដែលជាហិរញ្ញប្បទានសម្បទានពីរដ្ឋាភិបាលចិន រួមជាមួយថវិកា​បដិភាគ របស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ និង បោសសំអាតយុទ្ធភ័ណ្ឌមិនទាន់ផ្ទុះ ៕