កោះកុង៖ ក្រុមអ្នកដំណើរទៅមកជាង៥០០នាក់ ត្រូវបានអាជ្ញាធរស្រុកស្រែអំបិលឃាត់ដំណើរវាស់ស្ទង់កម្តៅ ដើម្បីទប់ស្កាត់ការរីករាតត្បាតជំងឺកូវីដនៅតាមបណ្តោយផ្លូវជាតិលេខ៤៨ ស្ថិតនៅចំណុចប៉ុស្តិ៍នគរបាលរដ្ឋបាលឃុំបឹងព្រាវ។ ប្រតិបត្តិការស្វែងរកជនសង្ស័យ និងបង្ការទប់ស្កាត់ជំងឺកូវីដ១៩នេះ ធ្វើឡើងតបតាមការណែនាំរបស់រាជរដ្ឋាភិបាលកម្ពុជា និងរដ្ឋបាលខេត្តកោះកុង ដោយផ្តោតការយកចិត្តទុកដាក់ខ្ពស់លើប្រឆាំងនឹងមេរោគកូរ៉ូណា ឱ្យកាន់តែមានប្រសិទ្ធភាព។ លោក ជា ច័ន្ទកញ្ញា អភិបាលស្រុកស្រែអំបិល បានឱ្យដឹងនៅរសៀលថ្ងៃទី២៨ ខែមីនា ២០២០នេះថា សកម្មភាពវាស់ស្ទង់ពិនិត្យសុខភាពអ្នកទេសចរណ៍ និងពលរដ្ឋអ្នកដំណើរតាមយានយន្តជាលក្ខណៈបឋមនេះ នឹងអនុវត្តរយៈពេល១សប្តាហ៍ពេញតែម្តង ចាប់ពីថ្ងៃទី២៨ មីនា តទៅ ក្នុង១ថ្ងៃ៨ម៉ោង។ លោក ជា ច័ន្ទកញ្ញា កត់សម្គាល់ថា ជាក់ស្តែងមួយព្រឹកតាំងពីម៉ោង៨មកទល់ម៉ោង១១និង៣០នាទី ថ្ងៃដដែល សមត្ថកិច្ចបានពិនិត្យសុខភាពទៅលើមនុស្សជាង៥០០នាក់ហើយ ដែលធ្វើដំណើរចេញចូលឆ្លងកាត់ភូមិសាស្រ្តក្នុងស្រុក ប៉ុន្តែគ្មានសញ្ញាអ្វីគួរឱ្យសង្ស័យឡើយ។ សម្រាប់នៅក្នុងមូលដ្ឋានភូមិឃុំរបស់លោកអភិបាលស្រុកស្រែអំបិលវិញ គឺមានពលករបម្រើការងារនៅស្រុកខ្លងយ៉ៃ ក្បែរព្រំដែនហាតឡេក ប្រទេសថៃចំនួន៥ទៅ៦នាក់ប៉ុណ្ណោះ បានវិលត្រឡប់មកលំនៅដ្ឋានវិញ។ ទោះយ៉ាងណា អាជ្ញាធរ និងមន្រ្តីសុខាភិបាលស្រុក បានតាមដានពិនិត្យក្បួនវេជ្ជសាស្រ្តយ៉ាងម៉ត់ចត់បំផុតចំពោះអាការៈសុខភាពអ្នកចំណូលថ្មី និងជំរុញឱ្យពួកគេនៅដាច់ដោយឡែកពីក្រុមគ្រួសារ ប្រសិនមានការសង្ស័យ ឬបញ្ហាសុខភាពមិនស្រួល ត្រូវរាយការណ៍ផ្តល់ពត៌មានភ្លាមៗមកកាន់អាជ្ញាធរ និងក្រុមគ្រូពេទ្យ ដើម្បីមានវិធានការទាន់ពេលវេលា។ បើតាមលោកអភិបាលស្រុកស្រែអំបិល ចាប់តាំងពីមានបទបញ្ជាណែនាំរបស់រដ្ឋាភិបាលកម្ពុជា និងរដ្ឋបាលខេត្តកោះកុងរួចមក ក្រុមការងារថ្នាក់ស្រុករបស់លោក បានយកចិត្តទុកដាក់ខ្ពស់ទៅលើសារផ្សព្វផ្សាយអប់រំខ្លួនពីវិធីបង្ការទប់ស្កាត់ជំងឺកូវីដ១៩យ៉ាងសកម្មគ្រប់មូលដ្ឋានភូមិឃុំដែលពលរដ្ឋកំពុងរស់នៅ។ បើងាកទៅមើល ដំណើរអាជីវកររបស់ពលរដ្ឋវិញ គឺប្រព្រឹត្តទៅធម្មតាទេ គ្រាន់តែថា រាល់ការចរាចរណ៍ទៅណាមកណាពួកគាត់ប្រុងប្រយ័ត្នម៉ាស់ និងមានដបអាល់កុល សម្រាប់លាងសម្អាតដៃ។ ទន្ទឹមនោះដែរ រដ្ឋបាលស្រុកស្រែអំបិល ក៏បានត្រៀមរួចរាល់ចំពោះយន្តការព្យាបាលជំងឺកូវីដ ដោយកំណត់យកមន្ទីរពេទ្យបង្អែកស្រុកជាទីតាំងធំទី១ និងវិទ្យាល័យស្រែអំបិលជាទី២ សម្រាប់ការបម្រុងទុកដាក់អ្នកជំងឺ ប្រសិនមានការកើនឡើង។ ហើយគ្មានបញ្ហាទេ ប្រព័ន្ធបណ្តាញទឹកភ្លើងអគ្គិសនីតម្លើងរួចរាល់ហើយដែរ ពោលគឺនៅតែរង់ចាំសម្ភារៈសុខាភិបាលបន្តិចបន្តួចប៉ុណ្ណោះ៕ អត្ថបទ: មករា